Կուրթանցի տղան նոր բնակարան կստանա և անվճար բուժօգնություն

ԱԺ «Իմ քայլը» խմբակցության պատգամավոր Սիփան Փաշինյանն այսօր այցելել է Կուրթան գյուղի բնակիչ Մեխակ Առաքելյանին, ով օրեր առաջ Ստեփանավանում տան խնդիր ունենալու հարցով մոտեցել էր վարչապետ Նիկոլ Փաշինյանին։

Հանդիպման ժամանակ պատգամավորը նշեց, որ Մեխակ Առաքելյանի բարձրաձայնած խնդիրները լուծելու համար շատերն են պատրաստակամություն հայտնել, սակայն տրամադրվող օգնությունը չի կարող մանրամասնել, քանի որ ընտրական գործընթացի մեջ են։ Նրա խոսքով՝ մանրամասները հանրությանը կներկայացվեն հանրաքվեից հետո, որպեսզի հիմա շահարկումներ չլինեն։

Լրագրողների հետ զրույցում Ստեփան Փաշինյանը ներկայացրեց, որ վարչապետի և Կուրթանի բնակչի՝ համացանցում տարածված հարցազրույցից հետո հասկացել է, որ նա իսկապես առողջական խնդիրներ ունի։ «Ես պատրաստակամություն եմ հայտնել օգնելու։ Ես ընդամենը եկա և Մեխակի ընտանիքին այդ լավ լուրի մասին տեղեկացրի։ Չեմ ցանկանա մանրամասներ ներկայացնել՝ անտեղի շահարկումներից խուսափելու համար»։

Նա խոստացավ, որ հանրաքվեից հետո, եթե հանրային հետաքրքրություն լինի, դետալային մանրամասն կներկայացնի, թե ինչ աշխատանքներ են տարվել։

Դիտարկմանը, թե արդեն մյուս քաղաքական ուժն պատրաստակամություն է հայտնել ընտանիքին օգնելու համար, արդյո՞ք այս դեպքում համագործակցություն կլինի, թե խնդրին առանձին կողմերով են մոտենալու, Փաշինյանը պատասխանեց․ «Չգիտեմ, թե իմ գործընկերներն ինչ են խոսել, բայց ամեն դեպքում ես իմ պարտքն եմ համարել գալ Մեխակի ընտանիք և հայտնել, որ մարդիկ պատրաստակամ են իրենց օգնել։ Բնականաբար, իմ ընդդիմադիր գործընկերների իրավունքն է լինել այստեղ, փորձել օգնել․ ես այստեղ որևէ խնդիր չեմ տեսնում»,- ասաց նա։

Հիշեցնենք, որ մարտի 7-ին Լոռու մարզ այցի ժամանակ Կուրթանի 34–ամյա բնակիչ Մեխակ Առաքելյանը մոտեցել էր վարչապետին ու խնդրել օգնել տան հարցով։

Վարչապետ Նիկոլ Փաշինյանը Մեխակին ուղիղ եթերում հանդիմանանքով հորդորել էր աշխատել ու տուն ստեղծել եւ վարչապետին նման հարցով չդիմել։

«Եթե ոտքը, ձեռքը տեղը առողջ տղամարդը գալիս, ասում է՝ «վարչապետ, ես տուն չունեմ», ես էլ տուն չունեի, որտեղի՞ց եմ տուն ստեղծել: Աշխատել եմ 24 ժամ և ստեղծել եմ իմ տունը: Դու էլ մի բան ձեռնարկիր, աշխատիր, եկամուտ ունեցիր, քո տունը սարքիր. վարչապե՞տն է քո տունը սարքելու: Հետն էլ երիտասարդ ընտանիքների համար հիպոթեքային ծրագիր ենք դրել, բա քեզ նման տղեն, կներես, մի քիչ էլ արժանապատվության  հարց է, առողջ տղամարդը կգա ուրիշ առողջ տղամարդու կասի` իմ տան, իմ հացի հարցը լուծի՞, բա իմ հացի հարցը ո՞վ է լուծելու: Չեմ ասում՝ պալատներ եմ սարքել, Երրորդ մասում ինձ համար 3 սենյականոց բնակարան եմ ստեղծել: Գնա աշխատի, քո  ընտանիքի հարցը լուծի»,-ասել էր նա: