Արմեն Թավադյանն ազատ արձակվեց. Տեսանյութ, լրացված

«5-րդ ալիք» հեռուստաընկերության սեփականատեր Արմեն Թավադյանն ազատ կարձակվի։ ՀՀ վերաքննիչ դատարանը որոշեց բավարարել փաստաբանների վերաքննիչ բողոքը և մերժել քննիչի միջնորդությունը կալանքը երկարացնելու մասին։

«Արմեն Թավադյանը ժամերի ընթացքում կլինի ազատության մեջ։ Պատճառը հիմնավոր կասկածի բացակայությունն է»,- լրագրողներին ասաց Արմեն Թավադյանի պաշտպան Հովհաննես Խուդոյանը։

«Հաստատվում է այն, ինչ ասում էինք վաղուց՝ այսքան ժամանակ պարոն Թավադյանն ապօրինի գտնվել է կալանքի տակ, ինչի իրավական հետևւանքներն ակնկալում ենք տեսնել պաշտոնատար անձանց քրեական հետապնդումների տեսքով»,- ասաց Հովհաննես Խուդոյանը։ Ինչ վերաբերում է քրեական գործին, փաստաբանն ասաց․ «Այս որոշման բովանդակությունից բխում է, որ Թավադյանը չի ցանկացել ինչ-որ մեկին կաշառել»։

***

«5-րդ ալիք» հեռուստաընկերության սեփականատեր Արմեն Թավադյանը րոպեներ առաջ դուրս եկավ Երևան-Կենտրոն ՔԿՀ-ից։ Ինչպես հաղորդում է տեղում աշխատող «Փաստինֆո»-ի թղթակիցը, Արմեն Թավադյանի աջակիցները նրան ծափերով դիմավորեցին։

«Գործի վերաբերյալ լավ կլինի, որ փաստաբանները պատասխանեն, կարող եմ ասել, որ լավ եմ, ինձ նորմալ եմ զգում, բանտում հանդիպել եմ շատ լավ մարդկանց, որոնք իրենց ծառայությունը կատարել են շատ պարկեշտ, ուշադիր են եղել։ Հիմա երեւի գնամ մի քիչ հանգստանամ, հասկանամ՝ ինչ է, ոնց է, ինֆորմացիայի կորուստ ունեմ»,-լրագրողների հետ ճեպազրույցում հայտարարեց Թավադյանը։ Նա ասաց, որ գործը շինծու է եւ 79 օր էր հարկավոր, պարզելու համար, որ ինքն առաջադրված մեղադրանքի հետ ընդհանրապես կապ չունի։

Երևան-Կենտրոն ՔԿՀ-ի մոտ Արմեն Թավադյանին դիմավորողների մեջ էին նաեւ ՀՀ 2-րդ նախագահի որդի Լեւոն Քոչարյանը, ՀՀ երկրորդ նախագահ Ռ.Քոչարյանի գրասենյակի ղեկավար Վիկտոր Սողոմոնյանը, 5-րդ ՀԸ տնօրեն Հարություն Հարությունյանը եւ ՀՀ երկրորդ նախագահ Ռոբերտ Քոչարյանի ազատության հանձնախմբի համակարգող Աղվան Վարդանյանը։

Zham.am