«Սերժ Սարգսյանն էդդքան էժան տղա չի, ջոմարդ է, ասել է՝ դու էլ ցմահ պետք է լինես ՍԴ նախագահ, Հրայր ջան». Փաշինյան. Տեսանյութ

Սա լավ առիթ է խոսելու բոլոր կուտակված հարցերի մասին՝ սկսած Արցախի հարցից, վերջացրած տնտեսությունից, ամեն ինչից: Այս մասին այսօր՝ մարտի 10-ին, Մեղրիում «Այո»-ի քարոզարշավի ժամանակ իր ելույթում նշեց ՀՀ վարչապետ Նիկոլ Փաշինյանը՝ հավելելով, որ ամեն բնակավայրում նույն ելույթը չի ունենալու, շարունակական է լինելու: Այս մասին տեղեկացնում է NEWS.am-ը:

Նա հիշեցրեց, որ 2015 թվականին սահմանադրական փոփոխությունների հանրքավեի կազմակերպման ժամանակ հնչում էին հայտարարություններ, որ դա արվում է Սերժ Սարգսյանի իշխանությունը երկարաձգելու համար. «Իշխանությունն ասում էր՝ տենց բան չկա, ի՞նչ եք ասում: Սա մեր երկրի ինստիտուտների կայացման համար է: Եվ ասում էին՝ հլա նայեք, թե ինչ փոփոխություններ ենք իրականացնում ՍԴ ինստիտուտի հետ կապված, որը հեղափոխական նշանակություն է ունենալու Հայաստանի համար: Սահմանադրության մեջ ՍԴ-ի մասին գրված է, որ ՍԴ-ն պետք է լինի հավասարակշռված, ապաքաղաքական  մարմին: Ասվում էր, որ եթե նախկինում նույն խորհրդարանական մեծամասնությունը եւ առաջադրում էր, եւ ընտրում էր ՍԴ անդամին, հիմա փոխում ենք ՍԴ ձեւավորման կարգը: Որ սրանից հետո ԱԺ-ն ՍԴ անդամի թեկնածու առաջադրելու հնարավորություն չի ունենալու, միայն քվեարկելու է կողմ կամ դեմ: Նոր կարգավորումներով ՍԴ երեք թեկնածու առաջադրելու է ՀՀ նախագահը, երեք թեկնածու կառավարությունը եւ երեք թեկնածու Դատավորների ընդհանուր ժողովը, որոնց հետո կքվեարկի խորհրդարանը»,-ասաց Փաշինյանը:

Նրա խոսքով, սա երաշխիք է, որ մենք կուսակցական, այսինքն մեկ խմբի կողմից ձեւավորված ՍԴ չենք ունենա:

Փաշինյանը ներկայացրեց, որ երկրորդ մեծ փոփոխությունն այն է, որ եթե ՍԴ անդամը մինչ այդ պաշտոնավարում էր ցմահ, ապա նոր Սահմանադրությամբ նա պաշտոնավարում է 12 տարով, իսկ ՍԴ նախագահն ընտրվում է 6 տարով եւ միայն մեկ անգամ: Երրորդ մեծ փոփոխությունն այն է, որ ՍԴ նախագահին ընտրում է ոչ թե ԱԺ-ն, այլ հենց ՍԴ դատավորները՝ իրենց միջից: ՍԴ նախագահի պաշտոնավարումը ցմահ էր, հիմա դարձել է 6 տարի:

«Այդ Սահմանադրությունն այս պահին 100 տոկոսով ուժի մեջ է: Հիմա հարց, իմ նկարագրած Սահմանադրական դատարանն այսօր մենք ունե՞նք, թե՞ չունենք: Ոչ, չունենք այդպիսի ՍԴ: Ըստ Սահմանադրության 6 տարին մեկ պետք է տեղի ունենա ՍԴ նախագահի ընտրություն, այսինքն հաջորդ ՍԴ նախագահի ընտրությունը պետք է լիներ 2024 թվականին, բայց երբ իրենց մեկնաբանությանը նայենք, դա պետք է  տեղիունենա 2035 թվականի: Այսինքն իրենք առնվազն ՍԴ նախագահի 2 ընտրություն իրենք չեղյալ են արել: Դա նույնն է, որ մենք ասենք, խորհրդարանը 2018-ին ընտրել եք լավ եք արել, մի հատ օրենք մտածենք, ու ասենք՝ մինչեւ 2035 թվականը ՀՀ-ում ԱԺ ընտրություն չի լինելու, որովհետեւ իրավակիրառ պրակտիկայի գիտահետազոտական դմփդմփիկը, որոշ դդումների դմփդմփիկը տենց մի հատ բան է նշանակում: Տենց բան ո՞նց կլինի, դա աբսուրդ է: Բայց հիմա հարց, այս մարդիկ ո՞նց են հաջողացրել դա: Նրանք անցումային դրույթներում գրել են, որ այս փոփոխությունները չեն վերաբերվում այն դատավորներին, որոնք ընտրվել են հին կարգով:

Բայց չկարծեք, թե դա հին դատավորների համար են արել: Դա արվել է նրա համար, որ երբ Սերժ Սարգսյանն ու Հրայր Թովմասյանը նստած մկրատով ոլորտները բաժանելիս են եղել, պարզ հարց է եղել. եթե Հրայր Թովմասյանը Սերժ Սարգյանի համար ստեղծում է հնարավորություն, որ նա ցմահ լինի ՀՀ ղեկավար, Սերժ Սարգսյանն էլ հո էդքան էժան տղա չի, ջոմարդ է, պետք է ասի՝ դու էլ ցմահ պետք է լինես ՍԴ նախագահ, Հրայր ջան»,-հայտարարեց ՀՀ վարչապետն ու շարունակեց. «Ասել են՝ քանի քեռիս սաղ ա, ինքը պետք է շոկոլադ ուտի եւ մինչեւ 2035 թվականը էս մարդու շոկոլադը պետք է մատակարարեն»: