Հանրաքվեն Սահմանադրական դատարանի անկախության սահմանադրական սկզբունքի ոտնահարում է. Արա Սահակյան. Տեսանյութ

Նոր իշխանության կարծիքով՝ Հայաստանում դիվանագիտական կորպուսը համալրվել է քաղաքական միջավայրից և կամայական սկզբունքով: Աշխատանքից ազատվեցինք մի քանի հոգով՝ ինձ համար վիրավորական մեթոդներով, սկսվեց արշավ և այդ արշավի տակ ով ընկավ, հեռացվեց աշխատանիքց: Այս մասին Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է 1990-98թթ.-ին ԱԺ փոխխոսնակ, Ղազախստանում ՀՀ նախկին դեսպան Արա Սահակյանը՝ անդրադառնալով իշխանափոխությունից հետո իր աշխատանքից ազատմանը:

Հարցին՝ ինչո՞ւ ինքը ևս աշխատանքից ազատվեց, հաշվի առնելով, որ այս իշխանության հետ ժամանակին որոշակի կապեր եք ունեցել, Արա Սահակյանը նշեց, որ ինքը չգիտի, քանի որ երջանկություն չի ունեցել այդ հարցը տալու իրեն աշխատանքից ազատողին:

Անդրադառնալով ԱԺ-ում առաջին ընթերցմամբ ընդունված ապօրինի գույքի բռնազավթման մասին օրենքների փաթեթին, որով թույլատրվում է բռնագանձել այն գույքը, որտեղ չի հիմնավորվում գույքի ձեռքբերման աղբյուրները, դիվանագետը նշեց. «Իրավական միջավայրի համար սա նորույթ է, որի կիրառումը մեծ խնդիր է առաջացնելու: Փաստորեն դատախազությունում ստեղծվելու է մի մարմին, որը զբաղվելու է այս հարցով: Հարց է առաջանում՝ որքանո՞վ են իրավասու անձինք մաքուր, որպեսզի այս օրենքը կիրառեն աշխատանքային պրակտիկայում»:

Ըստ Արա Սահակյանի՝ այս օրենքը կիրառելուց առաջ պետք է շատ լուրջ իրազեկմամբ զբաղվել և հանրությանն ավելորդ շոկի չենթարկել. «Ես կոռուպցիային դեմ եմ, բայց ես նաև դեմ եմ, որ դա արվի հախուռն կերպով: Ի վերջո՝ կոռուպցիայի դեմ պայքարը նոր չի սկսվել: Մարդիկ գոնե գիտե՞ն, որ վերջին տասը տարում Հայաստանը օրենսդրորեն լուրջ պայքար է տարել կոռուպցիայի դեմ»:

Հարցին՝ այս օրենքում բոլշևիկյան տարրեր կա՞ն, Արա Սահակյանը պատասխանել է. «Ոգևորություն, «ուռա՜» տրամադրություններ կարող է լինեն: Համենայնդեպս ես տեսնում եմ, որ կան մարդիկ, ովքեր ասում են՝ հանրաքվեից հետո տեսեք՝ ինչեր ենք անելու»:

Արա Սահակյանի կարծիքով՝ այս օրենքի ընդունումից առաջ պետք էր յոթը չափել, նոր ձևել:

Դիտարկմանը՝ հնարավո՞ր է լինի սեփականության վերաբաշխում, Արա Սահակյանը պատասխանել է. «Եթե նման բան լինի, ապա դա շատ վատ կլինի: Պետք է այնպես անենք, որ մեր զավակները միմյանց նկատմամբ չթշնամանան: Ավելի լավ է մենք իրենց խաղաղ կյանք թողնենք, քան՝ կուշտ»:

Խոսելով ապրիլի 5-ին սպասվող հանրաքվեի ու դրա անհրաժեշտության մասին՝ Արա Սահակյանն ասել է. «Հանրաքվեն Սահմանադրական դատարանի անկախության սահմանադրական սկզբունքի ոտնահարում է: Նախարարները կարող են ու շատ ցանկալի է, որ փոխվեն, պատգամավորները ևս, բայց դատավորներն անփոխարինելի են: Ոտնահարվում է դատավորների անկախության սկզբունքը»:

Արա Սահակյանը հիշեցրեց ու զգուշացրեց՝ եթե մեկ անգամ ոտնահարվում է դատավորի իրավունքը, ապա հաջորդ իշխանությունը պատմությունը հետ է շրջելու, իսկ հասարակությունն ընկնելու է հավերժական կրկնությամբ շրջապտույտի մեջ:

Ըստ Արա Սահակյանի՝ գործադիր իշխանությունը հաշվեհարդար է տեսնում Սահմանադրական դատարանի հետ: