Երևի մենք ուշացրել ենք այս հանրաքվեն, այն պետք է ավելի շուտ լիներ. Սասուն Միքայելյան. Տեսանյութ

Հանրաքվեն պետք է շուտ լիներ: Երկրում իշխանափոխություն է եղել, և ինչ իրավական հարց լինում է, ՍԴ-ն ուրիշ ճանապարհով է տանում: Այս մասին լրագրողների հետ ճեպազրույցում ասաց ԱԺ «Իմ քայլը» խմբակցության պատգամավոր, ԵԿՄ նախագահ Սասուն Միքայելյանը՝ անդրադառնալով սահմանադրական փոփոխությունների հանրաքվեին:

«Բնականաբար մենք չենք սպասելու մինչև 2035թ., որ նախորդ իշխանություններն ըստ իրենց ցանկության բերել-մտցրել են և ժամկետ են դրել այդ մարդկանց (ՍԴ դատավորներ) վրա, որ իրենց իշխանությունը պահեն, բնականաբար այսօր մենք նորից հնարավորություն ենք տալիս, որ ժողովուրդը քվեարկի. կողմ կքվեարկի, հարց չկա, դեմ կքվեարկի, իր որոշելիքն է»,-ասաց նա:

Դիտարկմանը, թե ըստ մամուլի հրապարակումների՝ Սասուն Միքայելյանը հանդիպում է ԵԿՄ անդամների, տարածքային կառույցների ղեկավարների հետ՝ քարոզելով սահմանադրական փոփոխությունների հանրաքվեին «Այո» քվեարկել, և, մասնավորապես, եղել է նաև Թալինում՝ Միքայելյանն արձագանքեց, թե բոլոր տեղերում էլ եղել է ու էլի գնալու է: «Տարածքային բաժանմունքներն եմ նայում՝ ինչ վիճակում են: Ես պարզ մարդ եմ, ուրիշ ուղղությամբ մի տարեք: Ես ԱԺ-ում ելույթ եմ ունեցել, որ մեր սահմանադրական իրավունքները խախտվել են, և մենք պարտավոր ենք գնալ ժողովրդին ձայնի իրավունք տալ, որ որոշի՝ սահմանադրական փոփոխություններ կատարի՞, թե՞ ոչ»,-ասաց նա:

Հարցին՝ արդյո՞ք ՀՀ երկրորդ նախագահ Ռոբերտ Քոչարյանին առնչվող քրգործից հետո սրվեց ՍԴ հարցը, Միքայելյանն արձագանքեց. «Մի բան կարող եմ ասել՝ երևի մենք ուշացրել ենք այս հանրաքվեն: Հանրաքվեն պետք է շուտ լիներ»:

Դիտարկմանը, թե մինչ Քոչարյանին առնչվող գործը՝ ԱԺ նախագահ Արարատ Միրզոյանն ասել է, թե ՍԴ հարցն ակտուալ չէ, Միքայելյանն արձագանքեց. «Ես Միքայելյան Սասունն եմ, ինձ հարց ունե՞ս: Ես պատասխանատու չեմ՝ ով ինչ է ասել»:

Դիտարկմանը, թե ինքն իշխող ուժի ներկայացուցիչ է, Միքայելյանն ասաց, թե ինքը իշխող չէ, այլ ազատ, անկախ հանրապետության իշխանության ներկայացուցիչ է, որին ընտրել է ժողովուրդը:

Մանրամասները՝ Tert.am-ի տեսանյութում: