Երեկ ռուսներն ու Ասադը մեծ հաջողություն արձանագրեցին Սիրիայում. ազատագրվել է կարևոր նշանակություն ունեցող Սարաքիբ քաղաքը

Եվ այսպես, Պուտինի ու  Էրդողանի մարտի 5-ի հանդիպումից առաջ  սիրիական բանակը ռուսների աջակցությամբ ազատագրեցին այդ երկրի համար ռազմավարական նշանակություն ունեցող Իդլիբի մարզի  Սարաքիբ քաղաքը: Սարաքիբը այն հանգույցն է, որը հատում է Մ5 և Մ4 մայրուղիները:

Հիշեցնենք, որ առաջին մայրուղին միացնում է Դամասկոսը Հալեպին, իսկ երկրորդը` Հալեպը Լաթակիային: Երեկվանից արդեն այս քաղաքը վերահսկում է ռուսական զինվորական ոստիկանությունը: Եվ դա այն դեպքում, երբ գրոհայիններին ակտիվորեն աջակցում էին թուրքական բանակի ստորաբաժանումները, միայն վերջին երկու օրվա  ընթացքում  թուրքական անօդաչու սարքերի միջոցով խոցվել է ավելի քան 100 սիրիական բանակի զինտեխնիկայի միավոր: Սակայն սիրիացիների համառ ջանքերի շնորհիվ մինչև Պուտին-Էրդողան հանդիպումը, հաջողվեց Իդլիբում ստանալ այնպիսի դիրքեր, որպեսզի բանակցությունների այս փուլում հնարավոր լինի այն քաղաքական տեսանկյունից կապիտալիզացնել: Դա թույլ տվեց, որ Էրդողանը հետնահանջ կատարի` հայտարարելով, որ իր նպատակը երբևիցե չի եղել «...գրավել Սիրիայից որևէ քանակի տարածք...»: Եվ արդեն հեղինակավոր դիտորդների  կարծիքով, մարտի 5-ին Էրդողանի խաղաթղթերը Պուտինի հետ բանակցություններում, մեղմ ասած,  ուժեղ չեն լինի:

Արևմտյան հեղինակավոր դիտորդների կարծիքով, Պուտինին վերջնարդյունքում հաջողվեց սկզբից հեռացնել Թուրքիային Արևմուտքից, իսկ հետո` մեկուսացնելով վերջինիս, կարողացավ  փոքր քայլերի միջոցով թուլացնել Անկարայի ազդեցությունը Սիրիայում: Իսկ այն, ինչ կատարվում է այս օրերին, ցույց է տալիս, որ Մոսկվան իր ռազմաքաղաքական մարաֆոնի վերջում ուզում է վերջնականապես դուրս մղել Անկարային Սիրիայի տարածքից:

Արտակ Հակոբյան