ՄԱԳԱՏԷ-ի փորձագետները պարզեցին, որ Հայաստանի միջուկային անվտանգությունը կարգավորող մարմնում առկա է որակավորված աշխատակիցների պակաս
Ինչպես օրերս հայտնի դարձավ, 09.05.2018 թ. մինչև 31.12.2019 թ. ՀՀ միջուկային անվտանգության կարգավորման պետական կոմիտեի աշխատակիցներին վճարված պարգևավճարների չափը կազմել է շուրջ 158 հազար ԱՄՆ դոլար:
Ու թեև այս փաստը լիովին տեղավորվում է կառավարության կողմից որդեգրված ինքնանպատակային խրախուսման քաղաքականության տրամաբանության մեջ, այնուամենայնիվ, առկա է մի հանգամանք, որին չանդրադառնալն այս համատեքստում առնվազն սխալ է:
2019 թ. Միջուկային էներգետիկայի միջազգային գործակալությունը (ՄԱԳԱՏԷ) մշտադիտարկում էր անցկացրել Հայաստանում՝ ընդ որում կառավարության հրավերով:
ՄԱԳԱՏԷ-ի փորձագետները պարզեցին ու արձանագրեցին իրենց ամփոփիչ զեկույցում, որ Հայաստանի միջուկային անվտանգությունը կարգավորող մարմնում առկա է որակավորված ու փորձառու աշխատակիցների պակաս: Անգամ ատոմային անվտանգության շվեյցարական դաշնային տեսչության գլխավոր տնօրենը ստեղծված կադրային իրավիճակը որակեց որպես կրիտիկական:
Հայտնի է, որ տրված գնահատականներից հետո կոմիտեում որևէ լուրջ բարեփոխում չի նախաձեռնվել, կադրային վիճակն էլ գրեթե նույնն է: Ուստի, տրված գնահատականը շարունակում է արդիական մնալ:
Հետևաբար, կոմիտեի աշխատակիցներին վճարվող շռայլ պարգևավճարները ոչ միայն արդարացված չեն, այլ վկայում են կառավարության կողմից ոլորտը վերահսկող անդրազգային առանցքային կառույցի գնահատականն անտեսելու մասին: Դա անխուսափելիորեն կանրդադառնա ՄԱԳԱՏԷ-ի՝ Հայաստանում իրականացվող հետագա առաքելությունների բովանդակության ու գնահատականների վրա՝ էապես սահմանափակելով միջուկային էներգետիկայի զարգացման ռեսուրսը:
Հ.Գ. Ի տարբերություն կարգավորող մարմնին տրված գնահատականների՝ ՄԱԳԱՏԷ-ն մշտապես դրական է գնահատել Հայկական ԱԷԿ-ի շահագործման ընթացքն ու անվտանգության մակարդակը: Դա, սակայն չխանգարեց Ն. Փաշինյանին իշխանության գալուն պես թիրախավորել հենց ԱԷԿ-ը՝ հայտարարելով կայանում 500 աշխատակիցների կրճատման անհրաժեշտության մասին:
Վահե Դավթյանի ֆեյսբուքյան էջից
Հետևեք մեզ Facebook-ում