Հայաստանում արդարադատության համակարգ չկա

Սերժ Սարգսյանին պաշտպանելու որոշ լրատվամիջոցների «անկեղծ մղումը» երբեմն անցնում է բարոյականության ու բանականության բոլոր սահմանները։ Երեկ մահացավ «Սասնա ծռերի» ապստամբության ժամանակ ՊՊԾ գունդը գրավածներին սնունդ հասցրած Արթուր Սարգսյանը։ Ո՞վ է նրա մահվան մեղավորը։ Ձեռքներդ դրեք խղճներիդ ու ասեք։ Լրատվականներից մեկը հրապարակել է այդպիսի մեղավորների մի ամբողջ ցուցակ՝ Սասնա ծռերի գործով քննիչից սկսած մինչև մարդու իրավունքների պաշտպան՝ արանքում էլ դատավորներ, դատախազ, արդարադատության նախարար ու չգիտեմ ով։

Մենք բոլորս էլ գիտենք, որ Հայաստանում պարզապես բացակայում է արդարադատության համակարգն ամբողջությամբ և արդար դատարանները՝ մասնավորապես։ Այդ համակարգը փոխարինում է մեկ մարդ՝ Սերժ Սարգսյանը։ Հաշվի առնելով Սասնա ծռերի գործի քաղաքական երանգները, ակնհայտ է, որ առանց «վերադասի հրահանգի» ո՛չ դատավորը, ո՛չ դատախազը, ո՛չ էլ արդարադատության սիմպո նախարարուհին ոչ մի որոշում չէին կարող կայացնել։ Այսինքն Արթուր Սարգսյանին կալանավորելու, նրան անազատության մեջ պահելու, ազատելու և նորից կալանավորելու որոշումը կայացրել է մեկ մարդ։ Եվ հենց նա է կրում Արթուրի մահվան ողջ պատասխանատվությունը։

Մնացածը, թեև հրեշտակներ չեն, սակայն լուռ կատարող են, այսինքն նրանց պատասխանատվությունն անձնավորված չէ․ՀՀԿ-ում քիչ չեն Արփինե Հովհաննիսյանի պես մարդիկ, որոնք պատրաստ են կատարել Սերժ Սարգսյանի հրահանգները։ Նույնը նաև դատական համակարգում, դատախազությունում և այլ։ Եվ այսպիսի խոսակցությունները՝ կոչերը, որպեսզի Սերժ Սարգսյանը պատժի մեղավորներին, ընդամենը մի անբարոյական փորձ են՝ մեղքը Սերժ Սարգսյանից ուրիշների վրա բարդելու։

Հրանտ Ենոքյանի ֆեյսբուքյան էջից