Նպատակ ունենք այս տարվանից ներդնել եկամուտների համատարած հայտարարագրման համակարգ. Դավիթ Անանյան. Տեսանյութ

Հաշվեքննիչ պալատի հետ համատեղ աշխատանքի հնարավորություն ենք ունեցել և այդ համատեղ աշխատանքի շրջանակում մեր մասնագետները ներկայացրել են իրենց առաջարկություններն ու դիտողությունները: Մի մասն ընդունվել են, որոնք որ մեր գործընկերների կարծիքով լրացուցիչ քննարկման առարկա են հանդիսանում: Այս մասին ԱԺ ֆինանսավարկային և բյուջետային հարցերի մշտական հանձնաժողովի նիստի ընթացքում ասաց ՊԵԿ նախագահ Դավիթ Անանյանը:

«2018 թվականի հունվարի 1-ից օրենսգրքի 53, 54 հոդվածով հարկ վճարողները հնարավորություն ունեն ստուգման ընթացքում ներկայացնել ճշտված հաշվարկներ: Որպեսզի իմանանք դա ինչ է և ինչպիսի ցուցանիշի մասին է խոսքը, մեր գործընկերները ներկայացրեցին 2 ստուգման ծրագրից որոշակի քաղվածքներ:

Պատասխանելով պատգամավորների հարցերին՝ ՊԵԿ նախագահն ասաց նաև, որ նպատակ կա այս տարվանից ներդնել եկամուտների համատարած հայտարարագրման համակարգ:

«Ասեմ ավելին, շատ ավելի վաղ էինք ուզում ներդնել, ժամկետներ չեմ ուզի ասել, բայց գիտեք՝ ես դրա դրոշակակիրներից մեկն եմ, ինչքան շուտ, այնքան լավ, որովհետև կարծում եմ՝ մեր հարկաբյուջետային քաղաքականության ապագան ընդհանրապես և հարկման քաղաքականության ապագան ֆիզիկական անձանց համատարած հայտարարագրման մեջ է»,- ասաց նա:

Ըստ Անանյանի՝ դա մեծ հնարավորություններ է տալու մնացած հարկերի հետ կապված հաշվեկշռային քաղաքականություն վարել: «Երեկվա քննարկմանը կառավարությունում ֆինանսների նախարարությունը բերել էր մի հայեցակարգային փաստաթուղթ, որտեղ հիմնական հարկային քաղաքականության հետ կապված 7 շեշտադրում կար կամ 7 հայեցակարգային նշանակետեր, որոնցից մեկի շրջանակներում համատարած հայտարարագրումը կար, որ մենք պետք է անպայման անենք: Շատ կարևոր շեշտադրումներ կան արտոնությունների հասցեականության ու կրճատման հետ կապված մեր դիրքորոշումը ձևավորելու, գույքահարկի ռեֆորմի հետ կապված և այլն: Այսինքն՝ այն, ինչ մենք իրար հետ քննարկել ենք, այնպիսի թեմաներ, որոնք արժանի են քննարկման, բոլորը խտացված են այդ 7 ենթանպատակների մեջ»,- ասաց Անանյանը:

Աղբյուրը՝ Tert.am