Է. Շարմազանովը Արթուր Սարգսյանի՝ «Հաց բերողի» մահվան մասին
ՀՀԿ մամուլի խոսնակ Էդուարդ Շարմազանովը կուսակցության Գործադիր մարմնի նիստի ավարտից հետո լրագրողների խնդրանքով մեկնաբանեց Արթուր Սարգսյանի՝ «Հաց բերողի» մահը և դրանում քաղաքացիների՝ իշխանություններին ուղղված մեղադրանքները:
- Մեր ցավակցությունն եմ հայտնում, բոլորիս անունից: Այսօր նաև վարչապետ Կարապետյանը լրագրողների հետ հանդիպմանը ցավակցություններ է հայտնել: Ցանկացած հայ մարդու կորուստ ցավալի է մեզ համար:
Ինչ վերաբերվում է նշված մեղադրանքներին, որքանով ես տիրապետում եմ ինֆորմացիայի, իսկ այդ ինֆորմացիան, կարծում եմ, հնարավորինս մոտ է օբյեկտիվին, Արթուր Սարգսյանի հիվանդության ժամամանակ բուժող բժիշկներն առաջարկել են, որ նա տեղափոխվի քաղաքացիական հիվանդանոց, և Արթուր Սարգսյանն է մերժել, - ասաց Շարմազանովը և հավելեց, որ ծանոթ է մահացածի փատաբանների հայտարարություններին, որտեղ կասկած է հնչում բժիշկների գնահատականների հետ կապված:
Էդուարդ Շարմազանովն ասաց, եթե առկա է Ա. Սարգսյանի մահվան վերաբերյալ փորձաքննության անհրաժեշտություն, ապա դրա անցկացման որևէ խնդիր չկա:
- Կան մարդիկ, որ անկեղծորեն են ցավում: Բայց չեմ կարող չասել, սա վերաբերում է նրանց, ովքեր փորձում են այս դժբախտությունը վերածել նախընտրական կրքերի, կամ դիվիդենտներ շահելու: Սա անթույլատրելի է: Սա ողբերգություն է, և սրա վրա փորձել դիվիդենտներ շահել, ես ճիշտ չեմ համարում: Մեղավորներ, եթե կլինեն, թող պատժվեն: - եզրափակեց ՀՀԿ խոնակը:
Zham.am
Հետևեք մեզ Facebook-ում