Աստված մի՛ արասցե համացանցում առկա թշնամանքն ու թույնը լցվի փողոց

Ինչպիսին է այսօր ներհայաստանյան իրականությունը։ Փաստացի հանրության գերակշռող մասն «ապրում» է համացանցային տիրույթում։ Դրա մի զգալի հատվածն ամենժամյա հաճախականությամբ հետևում է տեղի ունեցող ներքաղաքական գործընթացներին, գնահատականներ տալիս` քննադատելով, հայհոյելով, թշնամիներ փնտրելով...

Հիմնականում այսպես է հասկացվում այդ թեզը, ովքեր «հեղափոխության» մասնակիցն են եղել, աջակցում են ներկայիս իշխանություններին, հավատարմության երդում են տվել Նիկոլ Փաշինյանին, կամ «հին» են, բայց դարձել են նոր խաղի կանոնների կրողը` նրանք սպիտակ են։ Իսկ ովքեր քննադատում են Նիկոլ Փաշինյանին և իր կուսակցության գործելաոճը, կամ աշխատել են նախկին իշխանությունների օրոք` նրանք սև են...

Այս բաժանարար գիծը քաշվելուց հետո` հանրությունը փաստացի բաժանվեց երկու մասի։ Անկախ նրանից` եղբայրդ է, քույրդ է, հայրդ է, թե որդիդ, միևնույնն է, եթե նա քննադատում է ներկայիս իշխանությանը, ապա նա ժողովրդի լավը չի ուզում, կողմ չէ դրական փոփոխություններին և միայն վատն է ցանկանում Հայաստանի Հանրապետության համար: Այս ենթագիտակցությունը հայության շրջանում ներդրեց Նիկոլ Փաշինյանն իր թիմի հետ միասին` տարիների ընթացքում հանրության ներսում միմյանց հանդեպ թշնամություն ու ատելություն սերմանելով, «սևերի ու սպիտակների» թեզը ներմուծելով մեր իրականություն...

Ներկայումս, այս մթնոլորտը համացանցում այնքան է սրվել, որ իրական, տեղեկատվական պատերազմ է ընթանում, որտեղ քիչ չեն հայհոյանքները, սպառնալիքները... Որքան կդիմանա հասարակությունն այս ամենին, դժվար է ասել, բայց մի օր պոռթկումը լինելու է։ Աստված մի՛ արասցե համացանցում տեղի ունեցողը դուրս գա այդ տիրույթից, ապա դա կարող է լինել մեր պետության վախճանը, քանի որ ուղղակի մարդիկ իրար ֆիզիկապես կոչնչացնեն, արյան գետեր կհոսեն և միասնականություն ու համերաշխություն բառերը հօդս կցնդեն...

Ցավալի է, բայց այս ամենը գնում է այդ ուղղությամբ, քանի որ ՀՀ վարչապետ Նիկոլ Փաշինյանը չի փոխում իր հռետորաբանությունը, այլ պարբերաբար անընդունելի բառապաշարով ելույթներ ունենալով` ավելի է շիկացնում մթնոլորտը։ Ենթադրում եմ, որ դա է իր հիմնական նպատակը, որպեսզի հանրությանը բաժանելով` փորձի տիրել, ապա թե ոչ` կկանխեր այս ամենը...

Հ.Գ. Խնդրանքս է բոլոր հայրենակիցներիս, սթափ գնահատել տեղի ունեցողը և շատ խորը չխրվել այս ճահճի մեջ, որը ներկայիս իշխանությունն է պարտադրում։ Իսկ Նիկոլ Փաշինյանի աջակիցներին խորհուրդ կտամ շատ զգոն լինել, քանի որ բումերանգի էֆեկտը միշտ գործում է, այն ինչ խոսում ու անում եք` ապագայում նույնը ձեր հանդեպ կարող է տեղի ունենալ։ Մի տրվեք ներկայիս իշխանության սադրանքներին, քանզի ոչ ոք հավերժ չէ և հատուցման ժամանակ` ձեր բոլոր խոսքերի ու արած քայլերի համար ինքներդ եք պատասխան տալու...ԱՍՏՎԱԾ ՊԱՀԱՊԱՆ ԲՈԼՈՐԻՍ:

Արտաշես Ասատրյանի ֆեյսբուքյան էջից