Զինծառայողների անհասկանալի ինքնասպանություններն ու վարչապետին հուզող ներքնաշորերի հարցը
«Իրատես» թերթը գրում է. «Բանակում առավել կարևոր հարց կա՞, քան զինվորների ներքնաշորերը նույն լվացքի մեքենայով լվանալն է: Սա ոչ թե հռետորական հարց է, այլ երկրի թիվ մեկ դեմքի հայտարարությունը արված քաղաքական թիվ մեկ ամբիոնից՝ Ազգային ժողովի դահլիճից: Նա վստահեցնում է, որ բանակի խնդիրների առյուծի բաժինը կապված է այն հանգամանքի հետ, որ զինվորներն իրենց ներքնաշորերը նույն լվացքի մեքենայով չեն լվանում, քանի որ քրեական ենթամշակույթի կրող են:
Անկեղծ ասած, չգիտեմ, թե հիգիենան երբ է ստորադասվել քրեական ենթամշակույթին, բայց դժվար թե գտնվի շարքային մեկ այլ քաղաքացի, որ համաձայնի նույն լվացքի մեքենայով լվանալ իր ու բոլորովին անծանոթ մեկի հագուստը: Եթե զինվորները նույնիսկ ոչ թե հիգիենայի կանոններից, այլ քրեածին բարքերից ելնելով են այդ կերպ մտածում ու վարվում, միևնույն է, այդ ամենի մեջ սխալ տրամաբանություն չկա: Իսկ եթե Նիկոլ Փաշինյանը նորմալ է համարում, ավելին՝ տարակուսելի է համարում, թե ինչպե՞ս կարելի է տարբեր մարդկանց ներքնաշորերը նույն լվացքի մեքենայի մեջ լվանալու մեջ վատ բան տեսնել, ապա առաջարկում ենք մեկտեղել բոլոր նախարարների ներքնաշորերն ու փռել նույն պարանին:
Ի դեպ. Նիկոլ Փաշինյանն այն թիվ մեկ պաշտոնյան է, որ ընդդիմադիր եղած ժամանակահատվածում Ազգային ժողովի ամբիոնից պարբերաբար բոցաշունչ ելույթներ էր ունենում, թե ինչպե՞ս կարելի է թույլ տալ, որ զինվորի գուլպայի, ներքնաշորի ու հիգիենայի այլ պարագաների համար ծնողը մտահոգվի: Պարոն վարչապետը բավական խիստ ու կոշտ էր որակում այն չինովնիկներին, որ այդ ամենի պատասխանատուն էին: Վարչապետն այժմ, ըստ երևույթին, մի շարք ելույթների նման նաև սրա մասին է մոռացել, բայց զինվորների գուլպայի. կոնֆետի ու տարբեր պարագաների մասին ծնողն է հոգում:
Նշենք, որ բանակում ներքնաշորերի հարցը Նիկոլ Փաշինյանի պատասխանն էր պատգամավորի այն հարցին, թե մտահոգիչ չե՞ն արդյոք վերջին շրջանում բանակում գրանցվող միջադեպերը, երբ զինվորները զոհվում են ոչ թե հակառակորդի գնդակից, այլ խաղաղ պայմաններում:
Վարչապետը, փաստացի, շրջանցեց հարցը, ու մինչ այսօր որևէ մեկը պատասխան չի տվել, թե բանակում ինչ է կատարվում: 2020-ի հունվարից մինչ օրս դեռևս չպարզված հանգամանքներում 13 զինծառայող է զոհվել, կամ սպանվել է ծառայակցի կողմից, կամ ինքնասպանության են դրդել: Իսկ այս ամենի ֆոնին երկրի գերագույն գլխավոր հրամանատարին հուզող միակ հարցն այն է, թե ինչու զինվորները ներքնաշոր չեն լվանում»:
Մանրամասները՝ թերթի այսօրվա համարում:
Հետևեք մեզ Facebook-ում