Ով և ինչպես է փաստաբանություն անում Երանոսյան եղբայրների համար

Մարտի 14-ին Ջրառատ գյուղում հանրապետական գյուղապետ Մովսես Գալստյանը իր կողմնակիցների հետ, ՀՀ փոխոստիկանապետ Լևոն Երանոսյանի և նրա եղբայր՝ նույնպես ոստիկանության աշխատակից Լեռնիկ Երանոսյանի մասնակցությամբ ավազակային հարձակում են գործել ՕՐՕ դաշինքի կողմնակիցների ու նրանց երեխաների վրա։ Միջադեպն ունի վառ արտահայտված քաղաքական բնույթ, ինչպես նաև հետևանք է այն անպատժելիության մթնոլորտի, որը տիրում է Հայաստանում Սերժ Սարգսյանի իշխանության առաջին իսկ օրվանից։

Պարզ է, որ իշխանությունները փորձում են միջադեպին կենցաղային հողի վրա տեղի ունեցած վեճի երանգներ տալ, դրա հետ մեկտեղ ՀՀԿ-ի փոխնախագահ Արմեն Աշոտյանի շուրթերով հնչեցնում են մե անհեթեթ գաղափար, թե իբր ՕՐՕ դաշինքի կողմնակիցներն են հրահրել միջադեպը՝ սեփական վարկանիշը բարձրացնելու համար։ Արմեն Աշոտյանի ասածն, իհարկե, որևէ աղերս չունի իրականության հետ և ցույց է տալիս միայն հհկ-ական պրոպագանդայի մտքերի գաղջությունը։ Փաստորեն Աշոտյանն ունակ է պատկերացնել, որ 16-ամյա երեխայի կոտրած թևի վրա կարելի է փիառ անել։ Սակայն Աշոտյանի կողքին կա մեկ այլ երևույթ, որն ավելի մեծ վնաս է հասցնում հանրությանը․դա Սերժ Սարգսյանի կողմից ստեղծված և նրան աջակցող 1in.am կայքը, որն՝ ի տարբերություն ՀՀԿ փոխնախագահի, ոչ թե «տեսականով», այլ արդեն հստակ հայտարարում է, թե իբր Ջրառատի միջադեպը հրահրել են ՕՐՕ դաշինքի կողմնակիցները, և իրենց ետևում կանգնած են ՀՀ երկրորդ նախագահ Ռոբերտ Քոչարյանը և ԼՂՀ նախկին պաշտպանության նախարար Սամվել Բաբայանը։

1in.am-ի այս ծայրահեղ իշխանամետ, նույնիսկ սերժամետ դիրքորոշումը գալիս է ապացուցելու այն, որ մեր երկրում ամենաթողությունը, քրեաօլիգարխիկ համակարգի կայացման պատասխանատուն ոչ այնքան ՀՀԿ-ն է, որքան անձամբ այս կայքի հետևում կանգնած Սերժ Սարգսյանը։

Հենց նա է բուծել լրատվական դաշտի «Երանոսյաններին», որոնք փորձում են կոտրել հանրության գլուխն իրենց ստերով ու կեղծիքով։ Երանոսյանների և 1in.am-ների վրա Սերժ Սարգսյանը կառուցել է իր իշխանությունը և արդեն քանի տարի է՝ ավիրում է Հայաստանի քաղաքական, հասարակական ու տնտեսական համակարգը։ Վաղ թե ուշ այս ամենն իր արժանի գնահատականը ստանալու է ժողովրդի ու պատմության կողմից։ Իսկ Սերժ Սարգսյանի սպասավորները ոչ պակաս պատասխանատվություն են կրելու այսօրվա իրավիճակի համար, քան իրենց ստեղծողները։

Արմեն Միքայելյան