«Հերիք ա, գործ արեք, հոգնեցրել եք ձեր ստատուսներով». Արամ Մանուկյան

Աջափնյակ վարչական շրջանի ղեկավարի նախկին տեղակալ Արամ Մանուկյանը ֆեյսբուքյան իր էջում գրել է. «Հեղափոխությունից (իշխանափոխությունից) առաջ, երբ Նիկոլ Փաշինյանը իր մի խումբ կուսակիցների և քաղակտիվի հետ հանդիպմանը ներկայացնում էր քայլերի ճանապարհային քարտեզը, մեզ մոտ առաջացած հարցերից մեկը՝ իսկ ինչ ենք անելու մենք, եթե մեր հանդեպ բռնություն կիրառվի, պատասխանը մեկն էր՝ ոչ մի բան, մենք բռնությանը պատասխանելու ենք ձեռքներս վեր բարձրացնելով։ Ընդունեցինք և պարտավորվեցինք այդկերպ վարվել։

Դե էլ չասեմ՝ հետագան արդեն գիտեք. ստացվեց առանց բռնության հասնել սերժի վարչակազմի հեռացմանը։

Եղան ընտրություններ, տվեցինք վստահության քվե։ Անցել է երկու տարի, տեսնում ենք իրավիճակներ, որտեղ դրսևորվում է կամ անգործություն, կամ անկարողություն, կամ էլ՝ դե ժամանակ դեռ կա՝ լավա լինելու ժողովուրդ ջան։

Իսկ ինչ են ասում հիմա, երեկվա դեպքից հետո՝ եթե այս իշխանությունը չլիներ, ժողովուրդը էս կաներ, էն կաներ ձեզ։ Այ ձեր ցավը տանեմ, ժողովուրդը չի արել էդ ժամանակին, դրա փոխարեն ձեզ մեծ վստահության քվե է տվել, որպեսզի ստիպված չլինի սեփական ձեռքերով իրացնի սրանց պատիժը։ Հերիք ա, գործ արեք, հոգնեցրել եք ձեր ստատուսներով, ոչինչ չասող ելույթներով, հների հետ հողմաղացային դոնքիշոտյան դուելներով։ Կատարե՛ք այն, ինչի համար ձեզ գործուղել ենք գործադիր և օրենսդիր իշխանություն: Ասել եք վենդետա չի լինելու, ամեն ինչ օրենքի սահմաններում, դե բա արեք, ո՞ւմ եք սպասում»: