«Մենք ունենք ընտրություն՝ թքել, թե չթքել եվրոպական կառույցների վրա». Նաիրա Զոհրաբյան

Ինչպես գիտեք երկու հայտարարություն եղավ, մեկը ԵԽ Հայաստանի հարցով համազեկուցողների կողմից, մյուսը Վենետիկի հանձնաժողովի ղեկավար Ջիանի Բուքիքիոյի կողմից: Այս մասին այսօր՝ փետրվարի 4-ին, ԱԺ-ում լրագրողների հետ զրույցում նշեց ԱԺ ԲՀԿ խմբակցության պատգամավոր, ԵԽԽՎ-ում հայկական պատվիրակության անդամ Նաիրա Զոհրաբյանը:

Նրա խոսքով, այս երկու հայտարարություններին հետեւած ներհայաստանյան արձագանքներն իր մոտ դեժավյույի տպավորություն է արթնացնում. «Նախկին իշխանության ժամանակ էլ միջազգային կառույցների հայտարարությունները վերցվում էին, էնտեղից պռճոկվում էին բառեր, արտահայտություններ, ձեւակերպումներ: Իշխանությունը դա փորձում էր ներկայացնել իր համար շահեկան կոնտեքստով, ինչը մենք տեսանք նաեւ այս անգամ, իսկ ընդդիմությունը փորձում էր ներկայացնել իրեն շահեկան տեսակետից: Սա ծիծաղելի է երկու կողմերի համար էլ: Այս երկու հայտարարություններից հետո ես կարդացի, որ ընդդիմությունն ասում ՝ ջախջախել են իշխանությանը, իշխանությունն էլ ասում է, որ ջախջախել են ընդդիմությանը: Սա ոչ որեւէ մեկի հաղթանակն է, ոչ էլ պարտությունն է: Այստեղ երկու հայտարարություններում էլ կա ռեալ մտահոգություն ՍԴ-ի շուրջ ստեղծված իրավիճակի: Երկրորդ, մտահոգությունների հասցեատերը հիմնականում իշխանությունն է, որքան էլ իշխանությունը փորձի ասել, թե ձեւակերպումներն իրեն ուղղված չեն: Սա ինձ հիշեցնում է հայտնի մուլֆիլմը, որտեղ ասվում է՝ չասենք ով է, բայց դա փղիկն է:

Ես կարծում եմ, որ Բուքիքիոն ավելի կոնկրետ էր իր հայտարարության մեջ, որովհետեւ երեւի թե իրենք տեղեկատվություն ունեին, որ համազեկուցողների հայտարարությունը որոշակի մեկնաբանելի է եղել եւ շատ հիշեցնում էր Մինսկի խմբի համանախագահների լղոզած, անհասցե հայտարարությունները»,-ասաց Նաիրա Զոհրաբյանը:

Նա ընդգծեց, որ որ պետք է հասկանալ, որ այս կառույցների հայտարարությունները չեն արվում ինչ-որ մեկին պատժելու կամ խրախուսելու համար. «Սրանք աշխատանքային հայտարարություններ են, որոնցից պետք է արվի հետեւություն»: Հարցին, թե Հայաստանը պարտավո՞ր է  հաշվի նստել այդ հայտարարությունների հետ, Զոհրաբյանը բացասական պատասխան տվեց. «Պարտավոր չէ, բայց եթե օրինակ միջազգային ինդեքս չափող որեւէ կառույց հայտարարություն է անում, որ ՀՀ-ում տնտեսական ցուցիչը լավ է, իշխանությունը միանգամից ճպ-ճպ-ճպ ֆեյսբուքյան բոլոր էջերում գրում է, թե տեսեք, ողջունել են եւ այլն: Իրավական իմպերատիվ պահանջ, որ այս հայտարարությունները պետք է հաշվի առնվեն, չկա, բայց կա ընդհանուր քաղաքական խաղի կանոն: Եթե մենք անդամակցել ենք ԵԽ-ին եւ պարտավորություն ենք ստանձնել, որ Վենետիկի հանձնաժողովի ռեկոմենդացիաները անպայմանորեն պետք է հաշվի առնենք, դրանց վրա պիտի չթքենք, մենք ունենք ընտրություն՝ թքել, թե չթքել: Այստեղ յուրաքանչյուր իշխանություն եւ ընդդիմություն պետք է անի իր հետեւությունը»:

Մանրամասները ՝ NEWS.am-ում: