Ջրառատի դեպքի շարժառիթը հին պատմություն ունի. Ուշագրավ մանրամասներ

Այսօր, Արմավիրի մարզի Ջրառատ գյուղում «Հայաստանի Հանրապետական» կուսակցության տեղական կառույցի ներկայացուցիչները զինված հարձակում են գործել «Օհանյան-Րաֆֆի-Օսկանյան» դաշինքի համակիրների վրա, որի հետեւանքով կան վիրավորներ: Ինչպես արդեն տեղեկացրել ենք, վիրավորները 3-ն են. Արայիկ Մելքոնյանը, Մելիք Մելքոնյանը եւ Հակոբ Մելքոնյանը: «Հրապարակ»-ին ուշագրավ մանրամասներ են հայտնի դարձել տեղի ունեցած դեպքից: Ջրառատ գյուղի մեր աղբյուրների փոխանցմամբ՝ հակասությունները Երանոսյանների և Մելքոնյանների միջև հին պատմություն ունի, եւ որ այսօրվա միջադեպի շարժառիթը միայն ապրիլի 2-ին կայանալիք ընտրությունները չեն: Բանն այն է, որ անցած տարվա սեպտեմբերի 18-ին տեղի ունեցած ՏԻՄ ընտրություններում Ջրառատում գյուղապետի 4 թեկնածուներից 2-ի մեջ էր հիմնական պայքարը՝ ներկայիս գյուղապետ Սամվել Գալստյանի և տուժող Հակոբ Մելքոնյանի: Ըստ ընտրության արդյուքների՝ Սամվել Գալստյանը հավաքել էր 647 ձայն, իսկ Հակոբ Մելքոնյանը հավաքել էր 394 ձայն:

Սամվել Գալստյանը, որը Լևոն Երանոսյանի քրոջ տղան է, գյուղում հեղինակություն է և այդ հանգամանքով է պայմանավորված նաև այն, որ գյուղացիները խուսափում են ցանկացած հարցից, որը որ առնչվում է այսօրվա դեպքի հետ: Մեր աղբյուրը նաև փոխանցեց, որ բացի 3 վիրավորներից, որոնք այս պահին գտնվում են Էրեբունի ԲԿ-ում, վնասվածք է ստացել նաև Հակոբ Մելքոնյանի հորեղբոր տղան՝ Գրիգոր Մելքոնյանը, ով աչքի հատվածում կապտուկներ ունի: Ամբողջ օրվա ընթացքում Մելքոնյանների տան դիմաց հսկողություն են իրականացնում ոստիկանները՝ ապահովվելու համար Մելքոնյանների հարազատների անվտանգությունը, քանի որ Երանոսյանենց տունը ընդամենը մի քանի մետր հեռավորության վրա է գտնվում իրենց տանից: