Ջրառատում անչափահասի ձեռքը կոտրել են լոմով. փաստաբան (տեսանյութ)

Արմավիրի մարզի Ջրառատ գյուղում կրակոցներից հրազենային և տարբեր աստիճանների մարմնական վանասվածքներ ստացած Մելքոնյանների փաստաբան Ինեսսա Պետրոսյանը լրագրողների հետ զրույցում տեղեկացրեց, որ մարտի 12-ի դեպքերի շարունակությունն էր այսօր Ջրառատում կատարվածը: Տեղեկացնում է newsbook.am_ը:

«Լյովա Երանոսյանը ոգևորություն ապրեց և շարունակություն տեղի ունեցավ, այսօր նրանք համարձակություն ունեցան անչափահաս երիտասարդի նկատմամբ ոտնձգություն կատարել, որի արդյունքում երեխան վիրավորում ստացավ»,- ասաց փաստաբանը:

Նրա տեղեկացմամբ` Արայիկ Մելքոնյանի ձեռքը կոտրել են լոմով, վնասվածքը խորն է և հետագայում պետք է վիրահատություն կատարվի:

«Դպրոցից դուրս գալուց հետո է եղել այդ միջադեպը, երեխային փորձել են հայհոյել, հրահրել են այդ միջադեպը: Ըստ իմ ունեցած տեղեկությունների՝ հենց գյուղապետարանի շենքում դարանակալած սպասելիս են եղել, որպեսզի հարձակում կատարվի: Լոմերով, զենքով, դանակներով միջադեպ է եղել»,- հայտնեց Պետրոսյանը:

Իսկ երբ հորեղբոր տղային օգնության է հասել Հակոբ Մելքոնյանը, նրա վրա կրակել են: Մելքոնյանները «Օհանյան-Րաֆֆի- Օսկանյան» դաշինքի համակիրներն են եղել, իսկ Հակոբ Մելքոնյանը նաև գյուղապետի թեկնածու է առաջադրված եղել Ջրառատում:

«Ես գիտեմ, որ ամսի 12-ի դեպքերի ժամանակ Լևոն Երանոսյանն է եղել: Լեռնիկ Երանոսյանն էլ, ի պաշտպանություն իրեն, հաղորդում է ներկայացրել»,- եզրափակեց նա:

Մանրամասները` տեսանյութում: