Ինչո՞ւ են ուզում միայն այս տղային հեռացնել ՔՊ-ից, երբ այս գործելաոճի գլխավոր պատասխանատուն վարչապետն է

Ըստ մամուլի տեղեկությունների`  հասարակական աղմուկից հետո ՔՊ-ում որոշել են Հենրիկ Հարթենյանին հեռացնել և Երևանի ավագանուց, և կուսակցությունից: Հիշեցնենք, որ այս անձնավորությունը  Երևանի ավագանու «Իմ քայլը» խմբակցության անդամ է: Վերջինս երեկ    Facebook-ի «stories» բաժնում տեղադրել է Սահմանադրական դատարանի նախագահ Հրայր Թովմասյանի դստեր ֆեյսբուքյան էջը, գրելով`  «Հ. Թովմասյանի աղջկա ֆբ-ն ա, ձեզ տեսնեմ ժողովուրդ ջան»:

Նրա այս գրառումը փաշինյանականների դասական ոճի գրառում է, որն օգտագործվում է արդեն ավելի քան 1.5 տարի: Այս ոճի ճարտարապետն ու հեղինակը անձամբ Նիկոլ Փաշինյանն է: «Ասֆալտին կփռեմ, պատերին կծեփեմ», «վնգստացող դատավորներ» և այլ քրեական ենթամշակույթային ձևակերպումների հեղինակն նույնպես Փաշինյանն է: Ճակատագրի հենգնանքով մարդն ով  խրախուսում է այս ամենը, հանրությունը պառակտելով երկու մասի, խրախուսում է ատելությունը հանրության մեջ, այսօր խոսում է այս երևույթների անթույլատրելիության մասին: Նրա թիմը ԱԺ-ում օրենքներ է ընդունում այս թեմայով:

Եթե հիտլերյան Գերմանիայի քարոզչության նախարար Գեբելսը այսօր ողջ լիներ, ապա կնախանձեր  իմքայլականների այս գործելաոճին, Քանզի երբեք քաղաքական ուժի ներկայացուցիչները այս աստիճանի ցինիկ դրսևորում չեն ունեցել:

Եվ ահա այսօր իմքայլականները, ըստ մամուլի, որոշել են զոհաբերել իրենց թիմից մեկին, մի գրառման համար, որն համահունչ է  իրենց ոգուն: Ինչ է սա, եթե ոչ դասական փարիսեցիություն: Այն ինչ գրում է երիտասարդ իմքայլական Հենրիկ Հարթենյանը, նույն բանը գրեթե ամեն օր ասում է իր առաջնորդ Նիկոլ Փաշինյանը:

Պարզապես ժամանակներն են փոխվել և հանրությունը արդեն հասկացել է, որ ի դեմս նոր իշխանությունների գործ ունեն պրոֆեսիոնալ ցինիկների հետ: Ովքեր իշխանությունից հարբաց իրենց զգում են տեր ու տիրակալ`  չհասկանալով, որ իշխանությունը ոչ միայն իրավունք ու վայելքներ են, այլև պատասխանատվություն: Պարզապես 1.5 տարի անց մարդիկ հասկացել են, որ սրանք  պատասխանատվության զգացումը դեռ լիարժեք չեն զգում,  և հանրության մեջ կամաց - կամաց հասունանում է նորերին մերժման գաղափարը, որը կարճ ժամանակ անց վերածվելու է այնպիսի ատելության, որը կար 2018 թ.-ին նախկինների նկատմամբ: Փաշինյանի շրջապատում արդեն հասկացել են դա և փորձում են քավության նոխազների միջոցով լուծել այս հարցը: Սակայն բոլորի համար տեսանելի է, թե որն է, և ով է այս ամենի գլխավոր պատճառը: Եվ մինչև այս ամենի արմատը չփոխվի, ոչ մի քավության նոխազ այլևս իմքայլականներին չի օգնի

Սա է իրականությունը:

Արտակ Հակոբյան