Ըստ Փաշինյանի, «հիբրիդային հեղաշրջման» մեջ ներքաշված է նաև Մոսկվա՞ն

Շատերը ուշադրություն չդարձրեցին վարչապետի այն դատողություններին, որտեղ նա խոսում էր իր դեմ, իբր,  «հիբրիդային պատերազմ»  իրականացնելու  մասին: Առանց անուն տալու, Փաշինյանը նշեց, որ ժամանակին իր դեմ «հիբրիդային հեղաշրջում է» նախապատրաստվել, բայց այն կանխվել է, որտեղ, իբր, ներքաշված են եղել ոչ միայն «ներսի», այլև «դրսի» ուժերը: Հաշվի առնելով, որ խոսելով «ներսի ուժերի» վերաբերյալ Փաշինյանը նկատի է ունեցել հիմնականում Վանեցյանին և նախկին իշխանության ներկայացուցիչներին, ապա կարող ենք պնդել, որ խոսելով «դրսի» ուժերի վերաբերյալ, նա նկատի ուներ հենց Մոսկվային: Քանզի այս ուժերը առավել սերտ կապեր ունեն հենց Մոսկվայի հետ: Թեև Փաշինյանը ուզում էր ցույց տալ, որ «ինքը ոչնչից չի վախենում», սակայն «դրսի ուժերի» մասին խոսելիս նա ցույց տվեց իր իրական վախերը, քանզի ունի Մոսկվայի հանդեպ ակնհայտ անվստահություն: Այդ տեսակետից  ապրիլյան պատերազմի մասին իր նախկին տեսակետի հարցում նա փորձեց ցույց տալ, որ կարող է «ճշմարտությունն ասել նույնիսկ մարդկանց երեսին», ակնարկելով այն, թե ինքը՝ Փաշինյանը, ապրիլյան պատերազմի վերաբերյալ բաց խոսել է ռուսների հետ:

Դժվար է պատկերացնել, թե ինչ կարող է ասած լինի Փաշինյանը, ասենք, Պուտինին կամ ռուս այլ գործչին այս թեմայով: Այն, որ ռուսնե՞րն են կազմակերպել այս պատերազմը: Նման հարցադրման դեպքում ռուսները իրենց զրուցակցին կուղարկեին Չեխովի աշխատության հայտնի համար վեց պալատ, այնտեղի ստալիննների, հիտլերների և նապոլեոնների հետ ընկերություն անելու: Այդ հայ հանրությունն է այս հարցերում անչափ «տոլերանտ»: Մեծապես  հայ հանրությունն է տառապում գիտաֆանտաստիկ և առավել անմեղսունակ դավադրությունների տեսություններով: Ինչը հասկանալի է, ավելի քան 600 տարի առանց պետականության ապրող ժողովուրդը ձեռք է բերել շատ ֆոբիաներ և բարդույթներ, որի պատճառով էլ աշխարը փրկելու, հավերժական շարժիչ պատրաստելու, տիեզերական տարատեսակ զենքեր ստեղծելու հարցում, քանակային և տոկոսային առումով, Հայաստանը հավասարը չունի աշխարհում: Սակայն դժվար էր պատկերացնել, որ դավադրության տեսություններին հավատացողներից մեկը երբևիցե կարող է դառնալ երկրի ղեկավար:

Սա է իրականությունը:

Արտակ Հակոբյան