Ապօրինի զենք կրելու, երկու կամ ավելի անձանց պատանդ վերցնելու ու գույքը վնասելու կետերով «Էրեբունի պլազա»-ի միջադեպի առթիվ հարուցվել է քրգործ. Դատախազություն

Այսօր Էրեբունի պլազայում գրանցված դեպքի առթիվ հարուցվել է քրեկան գործ մի քանի հատկանիշներով, կրակոցներ արձակած տղամարդը ձերբակալվել է: Tert.am-ի հարցին ի պատասխան ասաց Գլխավոր դատախազության հանրային կապերի բաժնի պետ Արևիկ Խաչատրյանը.

«Դեպքի առթիվ հարուցվել է քրեական գործ ՀՀ քրեկան օրենսգրքի 235-րդ հոդվածի 1-ին մասի, 185-րդ հոդվածի 2֊րդ մասի 1֊ին և 218֊ի 2֊րդի 2-րդ, 3-րդ և 7-րդ կետերի հատկանիշներով, զինված անձը ձերբակալվել է»,- նշել է Խաչատրյանը:

Նշենք, որ ՔՕ-ի 235-ի 1-ին մասը սահմանում է՝ ապօրինի կերպով զենք իրացնելը, պահելը, փոխադրելը կամ կրելը, 185-ի 2-րդ մասի 1-ին կետը սահմանում է՝ պայթյունի կամ հանրավտանգ այլ եղանակով գույքը դիտավորությամբ ոչնչացնելը կամ վնասելը, իսկ 218-րդ հոդվածի նշված կետերը սահմանում են կյանքի կամ առողջության համար վտանգավոր բռնություն գործադրելով, զենք կամ որպես զենք օգտագործվող առարկաներ գործադրելով՝ երկու կամ ավելի անձանց պատանդ վերցնելը: