Արա Վարդանյանը չկալանավորվեց

«Հայաստան» համահայկական հիմնադրամի նախկին գործադիր տնօրեն Արա Վարդանյանի խափանման միջոց գրավը կալանքով փոխարինելու դատախազության բողոքն այսօր Քրեական վերաքննիչ դատարանը մերժել  է:

Հիշեցնենք` Վարդանյանին մեղադրանք էր առաջադրվել 2018 թվականի հուլիսին յուրացումներ կատարելու, ինչպես նաև հասարակական կազմակերպության ծառայողի լիազորությունները չարաշահելու կասկածանքով:

Ըստ այդ մեղադրանքի` Վարդանյանը հիմնադրամին տրամադրած 25 միլիոն դրամի վարկային գծով բանկային քարտով առցանց խաղատներում խաղադրույքներ է կատարել: Ընդհանուր իրավասության դատարանը Արա Վարդանյանին 1 մլն դրամ գրավի դիմաց ազատ էր արձակել:

Հուլիսի 10-ին Վարդանյանը հիմնադրամի գործադիր տնօրենի պաշտոնից հրաժարականի դիմում ներկայացրեց։ 2019թ. հոկտեմբերին մեղադրանքը լրացվեց 179-րդ հոդվածի 3-րդ մասով` յուրացման հատկանիշներով, որի համաձայն` Վարդանյանը  հասցեատերերին չի մատակարարել հիմնադրամի ենթակա ձեռնարկություններից մեկի արտադրանքը:

Արա Վարդանյանն ավելի ուշ իր ֆեյսբուքյան էջում գրառում է կատարել, թե կմնա ազատության մեջ։