Մարդ, որ սիրահարված էր կյանքին. այսօր Առնո Բաբաջանյանի ծննդյան օրն է

Այսօր հայ անվանի կոմպոզիտոր, դաշնակահար Առնո Բաբաջանյանի ծննդյան օրն է: Առնո Հարությունի Բաբաջանյանը ծնվել է Երևանում, 1921 թվականի հունվարի 22-ին։ Իր առաջին երաժշտական ստեղծագործությունը գրել է 9 տարեկան հասակում։ 1938 թվականին մեկնում է Մոսկվա և միանգամից ընդունվում է Գնեսինների անվան երաժշտական քոլեջի վերջին կուրս։ Այն ավարտելուց հետո ընդունվում է Պ. Ի. Չայկովսկու անվան ՄՊԿ (Բ. Մ. Բեռլինի դաշնամուրի դասարան):

Նրա տաղանդը դեռ հինգ տարեկանում նկատելով՝ Արամ Խաչատրյանը որոշում է, որ տղան պետք է երաժշտությամբ զբաղվի։ Դրանից հետո, 1929-ին Բաբաջանյանն ընդունվել է Երևանի պետական կոնսերվատորիային կից երաժշտական դպրոցը, որն ավարտելուց հետո սովորում է կոնսերվատորիայում։ Այնուհետև, 1948-ին ուսումը շարունակել է Մոսկվայի կոնսերվատորիայի դաշնամուրի բաժնում՝ միաժամանակ կատարելագործվելով Մոսկվայում գործող Հայաստանի կուլտուրայի տանը կից ստուդիայում։

1950-1956 թվականներին դասավանդել է Երևանի կոնսերվատորիայում։ 1956-ից ապրել և աշխատել է Մոսկվայում։ Բաբաջանյանը մահացել է 1983 թ. նոյեմբերի 15-ին:

Իրականում… Առնո Բաբաջանյանը ծնվել է հունվարի 21-ին, սակայն դա Լենինի մահվան օրն է, այդ պատճառով կոմպոզիտորի հայրը ծննդյան օրը փոխել է, նշել հունվարի 22: Դժվարին ժամանակներ էին, և հարևանները կարող էին լուր տալ, թե համընդհանուր սգո օրը Բաբաջանյան ընտանիքում ուրախություն է:

Հյուրախաղերն Առնո Բաբաջանյանին հայտնի դարձրին նաև ԽՍՀՄ սահմաններից դուրս: Կոմպոզիտորը երբեք չէր մոռանում իր արմատները, դա թույլ չէր տալիս նաև իր հարազատներին: Պոետ Անդրեյ Դեմենտևը մի անգամ պատմել է, որ Բաբաջանյանի հետ երկար է աշխատել:

«Նա մարդ էր, ով սիրահարված էր կյանքին: Նրա մեջ այնքան հումոր կար, մարդկայնություն, որ անգամ երաժշտությունն էր ծնվում այդ բարությունից: Նա ուներ գեղեցիկի յուրահատուկ զգացում: Բաբաջանյանը մնաց լույսի ու ուրախության կոմպոզիտոր»,- ասել է նա: