«Եթե նախարարը Աշոտյանը լիներ, ես իմ թոռնիկին դպրոց չէի ուղարկի, ավելի լավ է անգրագետ մնար». Սասուն Միքայելյան

Այսօր «Հայելի» ակումբում «Ելք» դաշինքի անդամ Սասուն Միքայելյանից լրագրողները հետաքրքրվեցին, եթե հանգանակություն եք կազմակերպում եւ կոչ անում, որ սփյուռքից էլ մասնակցեն, չե՞ք կարծում, որ դա կդիտարկվի որպես դրսից ֆինանսավորում քաղաքական ուժին: Սասուն Միքայելյանը պատասխանեց. «Մենք երբեւիցե սփյուռքին նման կոչ չենք արել, որ մեզ ֆինանսավորեն: Այս մասին գրում է aravot.am-ը: Մենք իրոք ֆինանսական պրոբլեմ ունենք, նման միջոցներով պետք է, որ ընտրարշավը շարունակենք»: Հետո Սասուն Միքայելյանը հայտարարեց, որ եթե իրենց ուժին կապում են Արեւմուտքի հետ, չի կարող դրսի ուժն իրենց վերահսկել. «Մենք ուզում ենք էս երկրում բան փոխել, անձամբ ինձ ճանաչողը ո՞նց կմտածի, որ ես կարող եմ մեկի ծառան լինեմ: Ընդամենը եկեք համախմբված փորձենք իրավիճակից դուրս գալ: Ոչ մեզ ՌԴ-ն է չգիտեմ ինչերի հասցրել, արեւմտամետ ենք, եվրոպամետ ենք, չգիտեմ ինչ ենք: Ես պատմությունից գիտեմ, որ դարեր ի վեր ՌԴ-ի ձեռով ենք մենք էս վիճակին հասել: Մի տեսակ էնպես կոմպլեքսավորված եք ՌԴ-ից»: Նա անդրադարձավ ընտրակաշառք բաժանողներին՝ ասելով.

«Իմ ժողովուրդը ապրանք չի: Ժողովուրդը պետք է գիտակցի, ինքնասիրության հարց կա: Անողները թող անեին ժամանակի ընթացքում, ոչ թե գերհարստանային ժողովրդի հաշվին, այսօր էլ ուզենան գնեն: Թույլ չտաք ձեր ինքնասիրությանը կպնեն, կոչ եմ անում: Կներեք, ժողովուրդ, դուք ապրանք չեք, որ ձեզ ուզենան գնեն»: Հարցին՝ հրապարակվում են հետազոտությունների արդյունքներ, ըստ որի վարչապետն ունի 80 տոկոսի վարկանիշ, բացի այդ, «Ծառուկյան դաշինքն» է առաջատարը, հավատո՞ւմ եք այդ հետազոտություններին՝ նա պատասխանեց. «Ձեր տված հարցումներով՝ մենք պետք է դռները փակենք գնանք տուն, էլ ի՞նչ մնաց: Ես սոցհարցումներին չեմ հավատում, Իրենք միշտ մեզ ցածր տոկոսներ են տալիս, որ ժողովրդի մոտ վստահություն չառաջանա, ասեն՝ միեւնույն է, իրենք չեն կարող անցնել, լավ է մյուսին ձայն տանք»: Հարցին՝ Փաշինյանն Արմեն Աշոտյանի հետ կգնա՞ բանավեճի՝ Սասուն Միքայելյանը պատասխանեց. «Փաշինյանը միշտ էլ պատրաստ է, էդ Աշոտյանի պրոբլեմն է: Կներեք, Ծառուկյանի հետ կապված, երբ երկրի ԿԳ նախարարն ասեց՝ Ծառուկյանը պետք է պատասխան տա, այսինքն, գենետիկորեն սխալ է, որ իր ծնողները նման ժառանգ են տվել, եւ դա ասում է երկրի ԿԳ նախարարը, ես թոռնիկ ունեմ, անունը Կոմիտաս է, եթե նախարարը Աշոտյանը լիներ, ես իմ թոռնիկին դպրոց չէի ուղարկի, ավելի լավ է անգրագետ մնար, քան թե նախարարը ուրիշի ցանկությամբ նման արտահայտություններ է անում: Ո՞նց կարա երկրի կրթության նախարարը նման բան ասի: Ուրիշ նախարար ասեր՝ ուրիշ բան»: