Թրամփը ՆԱՏՕ-ի գլխավոր քարտուղարին խնդրել է ուժեղացնել Մերձավոր Արեւելքում դաշինքի մասնակցությունը

ԱՄՆ նախագահ Դոնալդ Թրամփը ՆԱՏՕ-ի գլխավոր քարտուղար Յենս Սթոլթենբերգին խնդրել է ուժեղացնել Մերձավոր Արեւելքում դաշինքի մասնակցությունը։ Հեռախոսազրույցի ժամանակ նրանք քննարկել են Մերձավոր Արեւելքում վերջին իրադարձությունները, ինչպես նաեւ տարածաշրջանում ՆԱՏՕ-ի դերը։

«ԱՄՆ նախագահը ՆԱՏՕ-ի գլխավոր քարտուղարին խնդրել է ուժեղացնել Մերձավոր Արեւելքում դաշինքի մասնակցությունը։ Կողմերը համաձայնել են, որ ՆԱՏՕ-ն կարող է մեծ ներդրում ունենալ տարածաշրջանային կայունության մեջ եւ միջազգային ահաբեկչության դեմ պայքարում։ Նրանք նաեւ պայմանավորվել են սերտ կապ պահպանել այդ հարցով»,- ասվում է հաղորդագրության մեջ։

Իրանի շուրջ իրավիճակը կտրուկ սրվել էր Բաղդադի օդանավակայանի շրջանում հունվարի լույս 3-ի գիշերը ԱՄՆ-ի հարվածներից հետո, որի հետեւանքով զոհվել էր Իսլամական հեղափոխության պահապանների կորպուսի «Ալ Քուդս» հատուկ նշանակության ստորաբաժանման հրամանատար Ղասեմ Սոլեյմանին։ Ի պատասխան՝ հունվարի լույս 8-ի գիշերը Թեհրանը հրթիռային հարվածներ էր հասցրել Իրաքի երկու օբյեկտներին, որոնք օգտագործվում էին ամերիկյան զինվորականների կողմից։ ԱՄՆ նախագահ Դոնալդ Թրամփը հայտարարել էր, որ հարվածների հետեւանքով ոչ մի ամերիկյան զինվոր չի տուժել ու խոստացել էր լրացուցիչ պատժամիջոցներ սահմանել Իրանի հանդեպ։

Աղբյուր՝ NEWS.am