Սա բարոյական հարված էր «5-րդ ալիքին». Հարություն Հարությունյան. Տեսանյութ

«5-րդ ալիք» հեռուստաընկերության սեփականատեր Արմեն Թավադյանի նկատմամբ կալանք կիրառելը ճնշում է հեռուստաընկերության վրա։ Այս մասին այսօր՝ հունվարի 8-ին, լրագրողների հետ զրույցում ասաց «5-րդ ալիքի» գործադիր տնօրեն Հարություն Հարությունյանը։ Հաղորդում է NEWS.am-ը

«Չի կարող ճնշում չլինել, երբ որեւէ լրատվամիջոցի սեփականատիրոջ ապօրինի ձերբակալում են՝ խայտառակ, սարքած մի պատմությամբ։ Այս ճնշման արդյունքում մենք կարող ենք խնդիր ունենալ, դա արդեն ճնշում է։ Նրա գույքի, անձնական հաշիվների վրա կալանք է դրվել, լսել եմ շշուկներ։ Ալիքին առաջին հերթին բարոյական հարված է։ Կա աշխատավարձերի խնդիր, գաղտնիք չէ, որ ցանկացած ԶԼՄ այս կարգի երկրում, որտեղ 3 միլիոնից քիչ է բնակչությունը, տնտեսությունը տրաքած վիճակում է, ներարկումներով է գոյատեւում։ Այդ ներարկումներն անում են սեփականատերերը»,- ասաց Հարություն Հարությունյանը։

«5-րդ ալիքի» գործադիր տնօրենի խոսքով՝ Թավադյանը կալանավորվել է ՀՀ երկրորդ նախագահ Ռոբերտ Քոչարյանի ընկերը լինելու պատճառով.

«Այս մեղադրանքն առաջադրել են զուտ իր անձնական կապերի համար։ Եթե ինքը չլիներ Ռոբերտ Քոչարյանի ընկերը, չէր կալանավորվի, նրան ընկերության համար են կալանավորել։ Ներկա Հայաստանում ընկերությունը ընդունելի տարբերակ չէ։ Բոլորը բոլորի վրա պետք է գործ սարքեն»։

Նշենք, որ քիչ առաջ Դատախազությունը մերժեց Արմեն Թավադյանին անձնական երաշխավորությամբ ազատ արձակելու միջնորդությունը՝ անհիմն լինելու պատճառաբանությամբ։

Հիշեցնենք, որ Արմեն Թավադյանը կալանավորվել է, ըստ Ոստիկանության տեսանյութի, ՀՀ երկրորդ նախագահ Ռոբերտ Քոչարյանի աջակից ներկայացող Վարուժան Մկրտչյանի կողմից «Մարտի 1-ի» գործով տուժողին ցուցմունքից հրաժարվելու առաջարկ անելու գործով։ Նրան ձերբակալել են ՀՀ քրեական օրենսգրքի 340-րդ հոդվածի 4-րդ մասի 1-ին կետով նախատեսված (Սուտ ցուցմունք, կեղծ եզրակացություն տալու կամ սխալ թարգմանության համար կաշառելը կամ հարկադրելը) հանցավոր արարք կատարելու կասկածանքով, ապա կալանավորել։

Մանրամասները՝ NEWS.am-ի տեսանյութում