Հրապարակվել է Իրաքում ամերիկյան բազաների հրիթռակոծության տեսանյութը

Հրապարակվել են Իսլամական հեղափոխության պահապանների կորպուսի կողմից Իրաքում ամերիկյան բազաների հրիթռակոծության առաջին կադրերը։ Տեսանյութը տեղադրել է IRIB News Agency գործակալությունը։ Տեսանյութում երեւում է, թե ինչպես են գիշերային երկնքում թռչում այրվող արկերը։

Նմանատիպ տեսանյութ է հրապարակել իր Twitter-ում Press TV-ն, եւ հաղորդել. «առաջին կադրերը Ալ-Ասադի ավիաբազային ուղղված հրթիռներից՝ ի պատասխան գեներալ Սուլեյմանիի սպանության»։

Իր հերթին ռուսական ՏԱՍՍ գործակալությունը հայտնում է, որ Իրանի կողմից Իրաքում գտնվող ամերիկյան բազայի հրթիռակոծման հետեւանքով, նախնական տեղեկությունների համաձայն, զոհվել է ութսուն մարդ։

Իրանական IRNA գործակալությունը, հղում անելով իր աղբյուրներին, հայտնում է, որ Իրանի կողմից Իրաքում ԱՄՆ ռազմական բազաների ուղղությամբ հրթիռային հարվածներից հետո ամերիկյան ինքնաթիռներ են այրվել:

Այս գիշեր Իսլամական հեղափոխության պահապանների կորպուսը մոտ 10 բալիստիկ հրթիռ է արձակել Իրաքում ԱՄՆ երկու ռազմաբազաների ուղղությամբ։ Այս պահին Վաշինգթոնը գնահատում է նախնական վնասը։