Ատոմ Ջանջուղազյանը հիշեցրեց Փաշինյանին, որ պետբյուջեն առաջին անգամ գերակատարվել է Քոչարյանի օրոք
ՀՀ Կառավարության տարեվերջյան նիստում ամփոփելով տնտեսական տարին ՀՀ վարչապետ Նիկոլ Փաշինյանը հետաքրքրվեց Ֆինանսների նախարար Ատոմ Ջանջուղազյանից՝ թե նա հիշում է դեպք, երբ է Հայաստանում նման ծավալներով գրանցվել բյուջեի գերակատարման դեպք վերջին անգամ:
«Պարոն վարչապետ առաջին անգամը (բյուջեի գերակատարում - խմբ.) եղել է 2004 թ., հավանաբար, որովհետև մինչ 2002 թվականը մենք ունեցել ենք խորը խնդիրներ, որոնք հանգեցրել են բյուջետային պարտքերի առաջացման և, ըստ էության, 2002 թիվն առաջին անգամ է, որ գերակատարում է եղել: 2004 թվականն ինչու՞ է տպավորված, որովհետև դա այն տարին է եղել, երբ լրացուցիչ բյուջե է ներկայացվել և Ազգային ժողովի կողմից հաստատվել է: Տոկոսային տարբերությամբ հիմա կդժվարանամ ասել, թե համադրելի էր, թե՝ ոչ, բայց այդուհանդերձ գերակատարում է», - ասաց ֆինանսների նախարարը:
Նա նաև հավելեց, որ դրան հաջորդող տարիներին շատ տարբեր պատկերներ են եղել անվանական արտահայտությամբ՝ թե գերակատարվել է, տարի է եղել նաև թերակատարման:
«Այստեղ կարևոր է հարվեր-ՀՆԱ ցուցանիշը, որի վերաբերյալ մենք դատողություն կանենք այն ժամանակ, երբ ՀՆԱ-ի անվանական մեծությունն արդեն հայտնի կլինի, և կտեսնենք ինչքանով է մեզ հաջողվել լուծել այն խնդիրը, որ առաջացած հարկերն ամբողջությամբ կամ ինչ չափով են առաջացած հարկերը համալրել բյուջեն», - եզրափակեց Ատոմ Ջանջուղազյանը:
Նիկոլ Փաշինյանն ի պատասխան ասաց, որ հետաքրքիր ցուցանիշ է և կարելի է ճշտել, դիմելով կառավարության անդամներին:
«Կճշտեք, որովհետև դա կարևոր է», - հրահանգեց վարչապետը:
Հիշեցնենք՝ ավելի վաղ Նիկոլ Փաշինյանն իր Ֆեյսբուքյան էջում գրել է, որ «Դեկտեմբերի 23-ի դրությամբ, 2019 թվականի պետական բյուջեն գերակատարվել է 89 միլիարդ դրամով (185 միլիոն դոլարով): Այսինքն՝ այսքան ավել հարկային եկամուտ ենք ունեցել 2019թ. բյուջեով կանխատեսված/նախատեսվածի համեմատ»:
Zham.am