Ի՞նչ մեդալով այս անգամ Սերժ Սարգսյանը կպարգևատրի Լևոն Երանոսյանին (Տեսանյութ)
Ամանորյա տոների ժամանակ շատերը չնկատեցին այն, որ Խորենացի փողոցում և Սարի թաղում ցուցարարների և ոստիկանների միջև տեղի ունեցած բախումների գլխավոր «հերոս» Լևոն Երանոսյանը պարգևատրվել էր «Հասարակական կարգի գերազանց պահպանման» համար մեդալով: Իր այս քայլով Սերժ Սարգսյանը ցույց էր տալիս, որ բոլոր նրանք, ովքեր իր իշխանության պահպանման համար պատրաստ են ժողովրդի վրա զենք բարձրացնել, կնոջ վրա նռնակ նետել, 16-ամյա տղայի աչք հանել, բոլոր այդ մարդիկ հարգված են լինելու իր կողմից և անպայման պարգևատրվելու են:
Հավանաբար, բարեկամի անպատժելիությունից մթագնել էր նաև Լևոն Երանոսյանի ազգական Մանվել Գալստյանի բանականությունը, և հենց այդ պատճառով նա մարտի 12-ին Արմավիրի մարզի Ջրառատ գյուղում զենքով հարձակվել էր «ՕՐՕ» դաշինքի կողմնակիցների վրա:
Հատկանշական է այստեղ նաև այն, որ Ոստիկանությունը փոխանակ կարգի հրավիրեր սադրիչին, ոստիկանական բաժին է տեղափոխել այն մարդկանց, ում վրա հարձակվել է Երանոսյանի ազգականը, և դեռ մի բան էլ հայտարարություն է տարածել, որից պարզ է դառնում, որ կոչ է անում զերծ մնալ չճշտված ու կանխակալ տեղեկություններ տարածելուց: Իհարկե, նման դեպքերը հաճախակիորեն կրկնվում են նախընտրական Հայաստանում, և հանկարծ չզարմանաք, երբ հաջորդ անգամ Հանրապետականներից մեկը նմանատիպ պահվածք դրսևորի ձեր բնակավայրում:
Լևոն Երանոսյանի եղբայր Մանվել Գալստյանը, հենց ինքը՝ Լևոն Երանոսյանը, և նրանց նմաններն են հանդիսանում Սերժ Սարգսյանի իշխանության հիմքը: Եվ քանի դեռ Սերժ Սարգսյանը իշխանության ղեկին է, այս մարդիկ շարունակելու են ահաբեկել ժողովրդին: Հետաքրքիր է՝ այս անգամ ի՞նչ մեդալով կպարգևատրվի Լևոն Երանոսյանը՝ իր ազգականի նմանօրինակ պահվածքի համար:
Արմեն Միքայելյան
Հ.Գ. Դեռևս չարժե ամբողջովին բացել փակագծերը, սակայն ջրառատցիները պատմում են, որ ի տարբերություն Լևոն Երանոսյանի, ով Խորենացի փողոցում կատարված վայրագությունների համար անպատիժ մնաց, նրա եղբայր Մանվել Գալստյանը, իր մաշկի վրա զգաց ժողովրդի ցասումի ամբողջ ուժը:
Հետևեք մեզ Facebook-ում