Թերթի նախկին խմբագրին սկսում են նյարդայնացնե՞լ իր վերահսկողությունից դուրս գտնվող լրատվամիջոցները

Ինչպես հայտնի է,  երեկ  գիշերը ներխուժել են «Ժողովուրդ » օրաթերթի և «ArmLur.am» կայքի խմբագրություն: Ներխուժել են դռնից և պատուհանից, ամբողջ խմբագրությունը տակնուվրա են արել:

Պարզվել է, որ դա շարքային գողերի ձեռագիրը չէ: Նպատակը երկուսն է՝  վախեցնել թերթի խմբագրին և մյուս ԶԼՄ-ների ներկայացուցիչներին, ովքեր իշխանության գրպանում չեն գտնվում, և միաժամանակ փնտրել  կոնկրետ տեղեկատվություն:

Բանն այն է, որ  ««Ժողովուրդ» օրաթերթը ս/թ մարտի 14, 15, 16-ին հրապարակեց գործում որպես վկա ներգրավված և հարցաքննված ՍԴ անդամ Ֆելիքս Թոխյանի, ՊՆ նախարարի նախկին տեղակալ Գուրգեն Մելքոնյանի և ՀՀ երկրորդ նախագահ Սերժ Սարգսյանի նախաքննական ցուցմունքները:

Այս շարքի հրապարակումների վերջին օրը՝ մարտի 16-ին, Հատուկ քննչական ծառայությունը (ՀՔԾ)  քրեական գործ հարուցեց «առանց քննիչի և դատախազի թույլտվության նախաքննության տվյալները հրապարակելու առիթով»:

Այս գործի քննության ընթացքում, ՀՔԾ-ն թերթի գլխավոր խմբագիր` Քնար Մանուկյանի հեռախոսային զանգերը վերծանել է՝ փորձելով պարզել, թե ով է եղել ինֆորմացիայի աղբյուրը, որը լրագրողին է տվել «Մարտի 1»-ի գործով ցուցմունքները, քանի որ ավելի վաղ գործով որպես վկա ներգրավված «Ժողովուրդ» օրաթերթի գլխավոր խմբագիրը հարցաքննության ժամանակ հրաժարվել է բացահայտել իր աղբյուրը՝ ասելով, որ նախ՝ նախաքննական գաղտնիք չի բացահայտել, քանի որ գործով կողմ չէ և չի տիրապետում գաղտնիքի, բացի այդ, սպասարկել է հանրային շահ:

Պարզվում է, որ օրերս Քնար Մանուկյանը «Մարտի 1»-ի գործով ցուցմունքները հրապարակելու գործի շրջանակներում կրկին հրավիրվել էր ՀՔԾ հարցաքննության:

Բոլոր այս փաստերը համադրելով՝ կարելի է կռահել, թե ովքեր կարող էին գիշերը մտնել խմբագրություն և ինչի համար:

Հետաքրքիր է, որ սույն փաստը նույնիսկ ձևականորեն իշխանության ներկայացուցիչների կողմից չի դատապարտվել: Լայվերի սիրահար Նիկոլ Փաշինյանը այս խնդրի շուրջ ծպտուն անգամ չարեց, փոխարենը այսօր արդարանում էր, թե ինչու է իրենց ընտանիքին հատկացվել լրացուցիչ ավտոմեքենա:

«Նոր» Հայաստանի և «դեմոկրատիայի բաստիոնի» իշխանությունները, բնականաբար, հանրությանը ոչ մի կոնկրետ ասելիք չունեն: Քանզի արդեն բոլորի համար է ակներև, թե գահավիժում է սպասվում նրանց գրեթե բոլոր ուղղություններով: Եվ դրա համար էլ, հավանաբար, փորձում են վախի մթնոլորտ սերմանեն հանրության մեջ, որպեսզի կանխեն հնարավոր բողոքի ալիքը իր դեմ:

Սա է իրականությունը:

Արտակ Հակոբյան