Էդմոն Մարուքյանը հայտնվել «свой среди чужих и чужой среди своих» վիճակում

Երեկ, ըստ  Էդմոն Մարուքյանի որոշմամբ, Դավիթ Խաժակյանը Երևանի ավագանուց  հետ կանչվեց: Նշենք, որ   հանրային և քաղաքական լայն շրջանակների կողմից այդ քայլը  խիստ բացասական  գնահատականի արժանացավ:

Ընդդիմությունը Էդմոնի այս քայլը գնահատեց՝  որպես իշխանություններին «կեղծ ընդդիմություն լինելու» ցցուն ապացույց: Իսկ իշխանությունն էլ «Իմ քայլը» ԱԺ խմբակցության անդամ` Թագուհի Ղազարյանի շուրթերով Մարուքյանի այս որոշումը բնութագրեց`  որպես «...ԼՀԿ-ի աշխատանքների տապալում  Երևանի ավագանիում...»: Ըստ Թագուհու,  եթե Երևանի ավագանու աշխատանքները բավարար են, ապա ինչու նույն ԼՀԿ-ի ջանքերով ԱԺ-ում որոշում կայացվեց ձևավորել լրացուցիչ քննիչ հանձնաժողով, որը պիտի քննի քաղաքապետարանի խնդիրները:

Տիկին Ղազարյանի այս քննադատությունը ամբողջովին բացահայտեց, թե ինչ աստիճանի է Փաշինյանը նյարդայնացած Մարուքյանի վրա: Փաստացի, ըստ Փաշինյանի, Մարուքյանը ոչ միայն միացել է իր` Փաշինյանի հակառակորդներին, այլև քաղաքապետարանի մասով  նույնիսկ «2-րդ ճակատ է» բացել արդեն նաև  ԱԺ-ում իր դեմ: Մինչդեռ Մարուքյանը ի սկզբանե այսպիսի ծրագրեր չի ունեցել: Նա միշտ փորձում էր իրեն տարանջատել մնացած ընդդիմությունից և միաժամանակ փորձում էր հանդես գալ հանրության առջև՝ որպես «Փաշինյանին բարեկամ, ընդդիմախոս»:

Պետք է նշել, որ այդպիսի գործելաոճով ժամանակին փորձում էր դիրքավորվել նաև ՕԵԿ-ը  Արթուր Բաղդասդարյանի գլխավորությամբ: Սակայն Հայաստանում այս գործելաոճը չի աշխատում: Նույն Բաղդասարյանը հետագայում դարձավ  թե իշխանության, թե ընդդիմության համար օտար տարր, արդյունքում նա և իր թիմը տխուր ապագա ունեցան:

Գրեթե նույն ճակատագիրն կարող է արժանանալ Մարուքյանը, եթե իհարկե իր այս գործելաոճից լուրջ հետևություն չկատարի:

Բոլորի համար էլ ակնհայտ է, որ Մարուքյանի այս որոշման վրա ազդել է Փաշինյանի շրջապատում Դավիթ Խաժակյանի նկատմամբ խիստ դժգոհությունը: Իսկ Մարուքյանը չի ուզում, որ իր թիմի նկատմամբ Փաշինյանի վերաբերմունքը դառնա խիստ անտոգոնիստական: Օրինակ՝ վերջին բյուջեի նախագծի քվեարկության  ժամանակ Մարուքյանի բոլոր թիմակիցները դեմ քվեարկեցին, բացի իրենից` Էդմոնից: Վերջինիս կողմից  դա մտածված տակտիկական քայլ էր:

Սակայն Հայաստանի քաղաքական դաշտում  առկա խաղի կանոնների համաձայն այս մոտեցման արդյունքում տվյալ քաղաքական ուժը վաղ թե ուշ հայտնվելու է ռուսերեն ասաց՝ свой среди чужих и чужой среди своих  վիճակում: Քանզի երկրի հանրային կառուցվածքն ու քաղաքական ուժերի գործնեության տրամաբանությունը թույլ չի տա, որ Մարուքյանի թիմը փորձի  այս դաշտում «ջոկերի» դեր կատարել:

Սա է իրականությունը:

Արտակ Հակոբյան