Մինչեւ տարեվերջ մնացել է 18 օր, իսկ կառավարությունը լրացուցիչ վարկեր է վերցնում. «Լուսավոր Հայաստան». Տեսանյութ

Մինչեւ 2019 թվականի վերջ մնացել է ընդամենը 18 օր, եւ իշխանությունները նո՞ր են միայն հասկացել, որ մեզ լրացուցիչ վարկեր են պետք։ Այս մասին ԱԺ արտահերթ նիստում դեկտեմբերի 12-ին ասաց «Լուսավոր Հայաստան» խորհրդարանական խմբակցության քարտուղար Գեւորգ Գորգիսյանը՝ դիմելով ֆինանսների փոխնախարար Արմեն Հայրապետյանին։

Նշենք, որ կառավարությունը Ազգային ժողովի քննարկմանն է ներկայացրել 4 վարկային համաձայնագիր՝ ավելի քան 120 մլն եվրո ընդհանուր գումարով, որոնք նախատեսվում է ստանալ մինչեւ տարեվերջ։ Այդ վարկերն անհրաժեշտ են 2019 թվականի պետբյուջեի դեֆիցիտը ծածկելու համար։

Ֆինանսների փոխնախարար Արմեն Հայրապետյանն ի պատասխան քննադատության ասաց, որ այս վարկային համաձայնագրերի ստորագրումը կախված է ոչ միայն Հայաստանի կառավարությունից, եւ որ այս շրջանում բանակցություններ են վարվել միջազգային դոնորների հետ, ինչն էլ հանգեցրել է ձգձգման։ Հայրապետյանը տեղեկացրեց նաեւ, որ վարկային համաձայնագրերը վերջնականապես համաձայնեցվել են նոյեմբերին, բայց դրանից հետո դրանք պետք է անցնեին նաեւ Սահմանադրական դատարանով եւ այլ ընթացակարգերով։