Խուճուճ Հովոն ցանկանում է Փաշինյանի դեմ «գարաժատերերի » հեղափոխությո՞ւն իրականացնել

Այն,  որ այս իշխանությունը պատահականություններից է բաղկացած, պարզ է արդեն բոլորի համար: Պարզ չէ, թե ինչքան է տևելու այս մղձավանջը, և ունի՞ արդյոք Հայաստանը բավարար ռեսուրս՝ դիմագրավելու այս արհավիրքին:

Օրինակ, օրեր առաջ, երբ ճանապարհային պատահարների աննախադեպ քանակ էր արձանագրվել,  առողջապահության նախարար Արսեն Թորոսյանը առաջարկեց չեղարկել բոլոր վարորդական իրավունքները և բոլորին նոր քննությունների ուղարկել: Հասկանալի է, որ եթե  նման անմեղսունակ առաջարկը  երկրի նախարարն է անում, ապա էլ ինչ սպասել ավելի փոքր տրամաչափի պաշտոնյաներից:

Իսկ այսօր էլ մեկ այլ «հայտնի քայլական»` Հովհաննես Ազոյանը,  նոր առաջարկով է հանդես եկել՝ կոչ անելով վերացնել մարդկանց բոլոր ավտոկայանները: Որպեսզի ասածս հերյուրանք չհնչի, բերենք բառացի  նրա խոսքերը,- « Եվ եթե ուզում եք Հայաստանում տուրիզմ զարգանա, ապա օր առաջ պետք է Երևանը մաքրել այս աղետի գոտի հիշեցնող ավտոտնակներից ու փոխարենը դարձնել, գոնե, սովորական կանաչ գոտի՝ եթե այգու փող չկա։ Իսկ թե ո՞նց, ասեմ: Ուղիղ կերպով խոսեք մեր քաղաքացիների հետ, բացատրեք նրանց հարցի լրջությունը, բարձրացրեք իրենց քաղաքացիական գիտակցությունը, ու թող համընդհանուր համաձայնությամբ բոլորը հանձնեն իրենց ավտոտնակները, իսկ դուք իրենց երեխաների համար ստեղծեք կանաչ գոտիներ այդ տարածքներում։ Հիմա դուք դա կարող եք անել, հետո ուշ կլինի»:

Ահա այսպես: Փաստորեն  Խուճուճ Հովոն ոչ միայն դերասան է, այլև պարզվում է հանրային խնդիրների շուրջ կարծիքներ հայտնելու իրավունք է իրեն վերապահել: Բայց մյուս կողմից, նա ումի՞ց է պակաս, օրինակ, Բադալյան Լուսինեի՞ց, ով ոչ միայն կարծիք է հայտնում, այլև «Իմ քայլը» դաշինքի Աժ պատգամավոր է դարձել:

Եթե այս ամենին  ավելացնենք նաև այն,  որ Կարգին Հայկոն Երևանի քաղաքապետ է ընտրվել, ապա ինչո՞ւ Խուճուճ Հովոն իրավունք չի ունենա կարծիք հայտնելու: Ումի՞ց է նա պակաս: Եվ ինչո՞ւ պիտի արդարություն չլինի նաև այս հարցում:

Ավելին,  հեղափոխության սկզբում  Հովոն նույնիսկ ուզում էր ԱԺ նախագահ դառնալ: Սակայն նա դավադրաբար «քցվեց» Փաշինյանի կողմից: Եվ դրա համար էլ, հավանաբար, հանդես է  գալիս այսպիսի առաջարկներով, որպեսզի Փաշինյանի իշխանությունը ժամ առաջ տապալվի կատաղած գարաժատերերի հեղափոխության արդյունքում:

Սա է իրականությունը:

Դավիթ Մկրտչյան