Դա աբսուրդ է. Ծառուկյանը հայտարարեց, որ ԲՀԿ-ն դեմ է քվեարկելու ՍԴ անդամներին վաղաժամկետ կենսաթոշակի գնալու վերաբերյալ փաթեթին. Տեսանյութ
«Բարգավաճ Հայաստան» կուսակցության նախագահ Գագիկ Ծառուկյանն այսօր ՀՀ Ազգային ժողովում լրագրողների հետ զրույցում հայտարարել է, որ նրա գլխավորած խմբակցությունը դեմ է քվեարկելու Սահմանադրական դատարանի անդամներին վաղաժամկետ կենսաթոշակի գնալու հնարավորություն տվող նախագծին:
«Գևորգ Պետրոսյանը ամբողջությամբ մեր կարծիքն արտահայտեց: Եթե մարդուն փաստացի չեն կարողանում մեղադրել իր կատարած գործի, անարդարության, լճացման համար, այլ առաջարկում են՝ մենք ձեզ գումար կվճարենք, որ դուք չաշխատելով դրանից կօգտվեք, եթե չէ, հունվարից հետո մենք դա չենք վճարելու, դա աբսուրդ է: Եթե մարդը հանցանք է կատարել, չի համապատասխանում աշխատանքին, թող հանեն, բայց այդպիսի առաջարկը աշխարհում ընդունված չի, չի կարելի: Ինչի՞ համար են խրախուսում, որ ինքը համաձայնի, գնա տունը նստի և գումարներ ստանա՞», - ասաց նա:
Գագիկ Ծառուկյանը նաև անդրադարձավ իրեն պատկանող ընկերություններում ՊԵԿ-ի ստուգումներին:
«Հիմա էսօր բացի Ծառուկյանից ո՞ւմ են ստուգում: Սերժ Սարգսյանի օրոք ստուգել են, Կարեն Կարապետյանի օրոք ստուգել են, հիմա նորից ստուգում են: Ես էլ ասում եմ՝ ստուգեք, բայց ստուգելուն ձեւ կա: էս երկրում մենակ Ծառուկյա՞նն է սեփականատեր: Հեղափոխությունից հետո ի՞նչ փոխվեց, մենակ էլի Ծառուկյանի՞ն պետք է ստուգեն», - ասաց նա:
Հիշեցնենք, որ օրեր առաջ մամուլում տեղեկատվություն էր հայտնվել այն մասին, որ ՊԵԿ-ը մոտ մեկ շաբաթ է լայնամասշտաբ ստուգումներ է սկսել ԲՀԿ ղեկավար Գագիկ Ծառուկյանին պատկանող Շանգրի Լա խաղատանը:
Zham.am
Հետևեք մեզ Facebook-ում