Ինչո՞ւ Փաշինյանը թույլ չի տալիս, որ Հայկ Մարությանը հրաժարական տա

Մամուլը պարբերաբար անրադառնում է Հայկ Մարությանի հրաժարականի խնդիրներին՝ նշելով, որ նա չի կարողանում կառավարել  և ուզում է հեռանալ իր պաշտոնից: Բերվում են տարբեր հիմնավորումներ, սակայն հաշվի չի առնվում գլխավորը:

Հայկ Մարությանը լավ դերասան է, միգուցե նաև լավ մարդ է: Ավելին՝  բազմաթիվ  հնարավոր կոռուպցիոն պատմություններին ես այդքան էլ հակված չեմ հավատալու: Միգուցե այս պատմությունները  ինչ -որ հիմքեր ունեն, սակայն  «մեծ գործեր» -ի մեջ դժվար թե Մարությանը թաթախված լիներ:

Սակայն մեկ բան ակնհայտ է, ժամանակակից երկրներում  մայրաքաղաքաների կամ մեծ քաղաքների ղեկավարներ են դառնում  կամ փորձված քաղաքական գործիչներ, կամ էլ փորձված մենեջերներ, ինչպես ժամանակին Շիրակը դարձավ Փարիզի քաղաքապետ, փորձառու Բլումբերգը կամ Ջուլիանին դարձան Նյու Յորքի քաղաքապետ:

Հայկ Մարությանը  այս շարքում ոչ լուրջ քաղաքական գործիչ է, ոչ էլ քաղաքային տնտեսության լուրջ մենեջեր: Նա պարզապես մյուսների նման ժամանակին  «քայլել էր» Փաշինյանի հետ, հայտնի  և սիրված դերասան էր, ինչը բավարար համարվեց, որ առաջադրվի քաղաքապետի պաշտոնում:

Արդյունքում, մեկ տարի առաջ  նա ավելի քան 80 տոկոս ձայնով դարձավ քաղաքապետ: Փաստացի նա ավելի շատ ձայն հավաքեց, քան նույնիսկ Փաշինյանն ու իր թիմը անցած խորհրդարանական ընտրություններում:

Սակայն մեկ տարի անց արդեն բոլորի համար է տեսանելի դարձել, որ  «Հայկը իր տեղում չէ»: Այդ իսկ պատճառով էլ  առաջանում են նրա մասին հրաժարականի խոսակցությունները, սակայն  բացի Հայկի ցանկությունից կա նաև Փաշինյանի հարցը: Բանն այն է, որ Հայկը Երևանի մաշտաբով ընկալվում է  «Փոքր Նիկոլ»: Ավելին՝  այս «քաղաքային Նիկոլը» ավելի շատ ձայն է ստացել ժամանակին, քան իսկական Նիկոլը: Հիշեցնենք, որ վերջինս իր թիմի հետ ստացել է ձայների մոտ 70 տոկոսը:

Եթե 80 տոկոս ստացած Հայկը մեկ տարի անց հրաժարան է տալիս, ապա նույնը կարող ենք սպասել նաև 70 տոկոս ստացած Նիկոլից: Այնպես չի, որ քաղաքում Հայկի մոտ չի ստացվել, իսկ ահա երկրով մեկ Փաշինյանի մոտ ստացվել է: Ավելին՝ Հայկի հանդեպ վերաբերմունքը զուգահեռվում է նաև Նիկոլի հետ: Վերջինս նույնպես չի ընկալվում՝ որպես տնտեսության կամ ղարաբաղյան բանակցությունների հմուտ գործիչ:

Այնպես որ, Հայկն ու Նիկոլը սիամական երկվորյակների պես կապված են իրար հետ և մեկի հեռացումը  կարող է մուլտիպլիկացիոն էֆեկտ տալ նաև մյուսի վրա:

Ահա թե ինչու Փաշինյանը ատամներով պաշտպանելու է և թույլ չի տալու,  որ Հայկ Մարությանը  հրաժարական տա իր պաշտոնից:

Սա է իրականությունը:

Արտակ Հակոբյան