«Լավ էլի»-ն՝ ԵՊՀ-ում

Մարտի 11-ին՝ ժամը 16:00-ին ԵՊՀ մեծ դահլիճում (ԵՊՀ կենտրոնական մասնաշենք) տեղի կունենա «Լավ էլի» ալտերնատիվ ռոք խմբի համերգը:

ԵՊՀ Ուսանողական խորհրդի մշակույթի հանձնաժողովի կողմից կազմակերպված համերգը նվիրված է Մայրության և գեղեցկության մեկամսյակին:

Մուտքն ազատ է բոլոր ցանկացողների համար:

«Լավ էլի» հայկական ալտերնատիվ ռոք խումբը կազմավորվել է 1996 թ. Վանաձորում: Խումբը հիմնել են Մհեր Մանուկյանն ու Գոռ Մխիթարյանը «Snack» խմբից, որոնց միացել են նաև Վահե Տերտերյանը և Դավիթ Գրիգորյանը «Ալք» խմբից։ Այս կազմով 1997-ին խումբը ձայնագրել է իր առաջին «Լավ» ալբոմ ձայներիզը։ Որոշ ժամանակ անց խումբը ժամանակավորապես լքում է Մհեր Մանուկյանը, իսկ Գոռը սկսում մեներգչի իր կարիերան։ 2001-ին խումբը կրկին միավորվում է։

2008 թվականից խումբն առանձնապես ակտիվ չէր՝ չհաշված առանձին ելույթները, երբ Գոռ Մխիթարյանն այցելում էր Հայաստան։

2012 թ. հուլիսին խումբը հայտարարում է համերգային ծրագրերի մասին։ Հուլիսին տեղի ունեցան բացօթյա համերգներ Երևանում և Վանաձորում, որից հետո խումբը հայտարարեց նոր ալբոմի թողարկման մասին։

«Լավ էլի» ալտերնատիվ ռոք խումբը մինչ այսօր ունի թողարկած 5 ալբոմ: