Էդմոն Մարուքյա՞նն է քուչի մակարդակից աճել, թե՞ Փաշինյանն է քուչի մակարդակին իջել․ Տեսանյութ

Այս նախընտրական շրջանի «ամենահետաքրքիր ինտրիգներից» մեկը թերևս Էդմոն Մարուքյանի՝ քուչի մակարդակից հանկարծակի աճն էր։ Դե, հիշում եք, երևի, Մարուքյանի «ոխերիմ գործընկեր» Նիկոլ Փաշինյանի հայտարարությունը, թե բա Մարուքյանը մնացել է քուչի մակարդակում ու չի աճում։ Վանաձորի ավագանու ընտրություններն ընդհանրապես բավականին հետաքրքիր էին, և այդ հետաքրքրության առյուծի բաժինը պատկանում էր այս երկու «թունդ ընդդիմադիրներին», որոնք այդ ընտրություններով փորձում էին չափել իրենց «ընդդիմականության թնդությունը»։

Ջանք ու եռանդ չխնայելով՝ ամեն առիթ օգտագործում էին մեկը մյուսին ՀՀԿ-ի հաճախորդ լինելու մեջ մեղադրելու համար։ Հիշեցնեմ, Փաշինյանը բավականին արդարացի նշում էր, որ Մարուքյանը «դեմ ըլլալով՝ կողմ էր քվեարկում» իշխանության կողմից առաջարկված նախագծերին։ Փաշինյանը նաև պայմաններ էր առաջ քաշում, որոնց կատարումը իբր պետք է ցույց տար Մարուքյանի՝ երդվյալ ընդդիմադիր լինելը։ Սակայն Մարուքյանը դրանք չկատարեց՝ ոչ այն ժամանակ, ոչ էլ հիմա։

Սակայն այսօր մենք մի զարմանահրաշ բանի ենք ականատես լինում։ Նիկոլ Փաշինյանը, որ իրեն միշտ փորձում է ներկայացնել որպես «խիստ սկզբունքային» քաղաքական գործիչ, այսօր գնացել ու դաշինք է կազմել՝ իր իսկ բնորոշմամբ, քուչի մակարդակում մնացած ՀՀԿ-ի հաճախորդ ուժի հետ։ Հիմա սա ինչո՞վ բացատրել։

Ի դեպ, հետաքրքիր է նաև Մարուքյանի պահվածքը․գոնե իր կողմնակիցները չեն մոռացել Նիկոլ Փաշինյանի պահվածքը և հայտարարությունները ավագանու ընտրությունների ժամանակ, չեն մոռացել նաև, որ Փաշինյանի քարոզարշավին աջակցում էր Արմեն Աշոտյանը, մի պահ նաև իշխանական հեռուստաալիքներն էին միացել Նիկոլի արշավին։ Եվ հիմա այդ մարդիկ էլ մեր նման նստած մտածում են․կարո՞ղ ա Նիկոլը ճիշտ էր Մարուքյանի պահով։ Բայց իրանք նաև գիտեն, որ Մարուքյանն էլ հաստատ ճիշտ էր Նիկոլի պահով։

Այս պարագայում, թերևս Սերժ Սարգսյանն է սխալ հաշվարկ կատարել․փորձել է «դուստր կազմակերպություններին» միավորի, որ կառավարումը ավելի հեշտանա, իրար դեմ էլ չաշխատեն, սակայն այդպիսի «խոշորացումը» բերել է կապիտալիզացիայի անկման։ Հիմա արդեն շատերի համար է պարզ, թե ովքեր են այդ մարդիկ։ Այսինքն նրանց համար, ովքեր հիշողություն ունեն։

Հրանտ Ենոքյանի ֆեյսբուքյան էջից