Սատանայի կամրջից մինչև Տաթևի վանք. հիմնանորոգվել է ավտոմայրուղին

2019-ին Սյունիքի մարզում աննախադեպ ճանապարհաշինական աշխատանքներ են իրականացվել: Վերանորոգված ճանապարհների թվում է Սատանայի կամրջից մինչեւ Տաթեւ ընկած ավտոմայրուղին:

Ինչպես «Սյունյաց երկիր» թերթի ֆեյսբուքյան էջն է գրում, դեռեւս 2010-ին պետք է հիմնանորոգվեր այդ մայրուղին, երբ գործարկվեց Տաթեւի ճոպանուղին: Սակայն վերաշինվեց միայն Շինուհայր-Հալիձոր-Սատանայի կամուրջ հատվածը: Ու միայն 2018 թ. աշնանը հաջողվեց շարունակել կիսատ թողածը:
Սատանայի կամրջից մինչեւ Տաթեւ մոտ 6,2 կմ մայրուղու հիմնանորոգումն ավարտվել է օգոստոսին:

Հիմնանորոգված ճանապարհին տեղադրվել են ազդանշանային սյուներ, բարիերներ, կատարվել գծանշումներ… Սատանայի կամուրջ-Տաթեւ մայրուղու հիմնանորոգումը կատարվել է «Տարածքային զարգացման հիմնադրամի» ծրագրով եւ Համաշխարհային բանկի ֆինանսավորմամբ:

Տաթեւ համայնքի ղեկավար Մուրադ Սիմոնյանի հավաստիացմամբ՝ բարձրորակ ճանապարհի շահագործումը նոր լիցք է հաղորդել դեպի Տաթեւի վանք զբոսաշրջիկների այցելությանը, էականորեն դյուրին է դարձրել ենթաշրջանի գյուղերի հետ հաղորդակցությունը:
Սատանայի կամուրջ-Տաթեւ մայրուղու վերին մասը՝ մոտ 320 մ երկարությամբ, սակայն, դուրս է մնացել ծրագրից՝ սողանքային լինելու պատճառով:

Սողանքային այդ հատվածի համար նոր նախագիծ է մշակվում:
Ամենայն հավանականությամբ՝ մայրուղու այդ հատվածը կշրջանցի սողանքային գոտին:

Ինչեւէ, ունենք Սատանայի կամրջից Տաթեւի վանք ձգվող պատշաճորեն հիմնանորոգված ավտոմայրուղի:

«Սյունյաց երկիր»-ի ֆեյսբուքյան էջից