ՀՀԿ-ն իր կեղտոտ գործին է խառնում նաև մանկավարժներին․ Լուսանկար

Սա Երևանի թիվ 6 հիմնական դպրոցի տնօրենի լուսանկարն է, որ տեսա այդ դպրոցի ֆեյսբուքյան էջում, ընդ որում սա այդ դպրոցի էջի գլխավոր նկարն է։ Ուշադրությունս գրավեց սեղանին դրված՝ «հանրապետական» թղթապանակը։ Ես չգիտեմ, ինչ գործ ունի այն դպրոցի տնօրենի սեղանին․գուցե, ինչ-որ միջոցառման ժամանակ են նվիրել, կամ տնօրենը կուսակցության անդամ է։ Սակայն սա անթույլատրելի է։ Հուսով եմ, սա պատահականություն է, հակառակ դեպքում միայն զարմանալ կարելի է, թե ինչ է ուզում այդ տնօրենը դրանով ասել։

Մեկ բան պետք է վերջապես հասկանանք, անցել են այն ժամանակները, երբ դպրոցը «կուսակցական դաստիարակության» առաջին աստիճանն էր․անընդունելի է քաղաքականությունը բերել կրթօջախներ, երեխաներին մանկուց «փչացնել»։ Տնօրենի այս լուսանկարը պարզապես մտորելու առիթ է, ես չգիտեմ, կա արդյոք նման երևույթ հենց այդ դպրոցում, բայց բոլորս էլ գիտենք, որ նման արատավոր երևույթը հատուկ է շատ դպրոցներին։

Այսօր էլ շատ դպրոցներում մանկավարժները՝ տնօրենից ու փոխտնօրեններից սկսած մինչև կեսդրույք աշխատող ուսուցիչներ, իրենց կոչումն ուրացած՝ ընտրությունից ընտրություն լծվում են ՀՀԿ-ի քարոզին։ Սա աննկարագրելի զզվելի երևույթ է, որը ոչ միայն որևէ արդյունք ունենալ չի կարող, այլ հակառակը՝ բացասական է ազդում ուսուցչի կերպարի վրա։ Դրանից հետո երեխաները հաստատ ավելի շատ չեն հարգի ոչ ուսուցչին, ոչ էլ դպրոցի տնօրենին։

ՀՀԿ-ն այնքան վարկաբեկված է, որ մեծից փոքր բոլորն են ատում այդ կազմակերպությանը, որը կրում է Հայաստանի այսօրվա ծանր վիճակի ողջ պատասխանատվությունը։ Ու հիմա, երբ իրենց կեղտոտ գործին խառնում են նաև մանկավարժներին, դրանից ատելությունը նրանց նկատմամբ միայն ավելանում է։

Հրանտ Ենոքյանի ֆեյսբուքյան էջից