Քանի դեռ հայկական զինված ստորաբաժանումներն այդ հողերի վրա են, միջադեպերը շարունակվելու են. Մամեդյարովը սպառնու՞մ է

Երեկ Ադրբեջանի արտգործնախարար Էլմար Մամեդյարովը ելույթ ունենալով  ՌԴ ԱԳՆ Դիվանագիտական ակադեմիայում, անդրադարձավ ղարաբաղյան հակամարտությանը: Ըստ ադրբեջանցի արտգործնախարարի, հակամարտության չկարգավորված լինելը տարածաշրջանի զարգացման գլխավոր  խոչընդոտն է: Փոխանցում է ԱՊԱ գործակալությունը:

«Մոտ 30 տարի է ինչ Ադրբեջանն ու Հայաստանը դեմ առ դիման կանգնած են այդ խնդրի առջև: Երեկ ՌԴ ԱԳ ղեկավար Սերգեյ Լավրովի հետ մանրամասն քննարկել ենք ղարաբաղյան հակամարտության կարգավորման ուղիները: Դա քննարկում ենք հանդիպումների ժամանակ ոչ միայն մենք՝ նախարարներս, այլև Ադրբեջանի և Ռուսաստանի ղեկավարները», - ասաց նա:

Մամեդյարովը բարձրաձայնեց նաև հակամարտության կարգավորման ադրբեջանական կողմի տեսլականը. «Հակամարտության կարգավորման համար Հայաստանն առաջին հերթին պետք է դուրս բերի իր զորքերը «օկուպացված» տարածքներից»:

Անդրադառնալով ղարաբաղա-ադրբեջանական հակամարտ զորքերի շփման գծում տիրող իրավիճակին, Մամեդյարովն ասաց, որ Ադրբեջանը կողմ է մոնիտորինգի անցկացմանը, սակայն դա պետք է լինի մեծ պլանի բաղկացուցիչ պլանը.

-Քանի դեռ հայկական զինված ստորաբաժանումներն այդ հողերի վրա են, միջադեպերը շարունակվելու են, - հավելեց նա:

Zham.am