Բա դրա՞ համար էին իշխանափոխություն անում. այսինքն, նպատակը քաղաքացի Նիկոլ Փաշինյանի կենսապայմանների բերալավո՞ւմն էր

Վարչապետության շրջանում ու համար, օրենքով, կառավարական առանձնատուն է հասնում: Թեթևակի չեմուչումից հետո (շատերը չեն հիշի, իշխանափոխության սկզբների «տաք-տաք» օրերին էր), Նիկոլ Փաշինյանը, որպես ՀՀ վարչապետ, ընտանյոք տեղափոխվեց հանրահայտ առանձնատների համալիր, որին ժողովուրդս կարճ կոնկրետ «դաչաներ» է ասում:
Հա, ու էս վերջերս վարչապետ Նիկոլ Փաշինյանի կեցավայր-առանձնատունը նորոգվել է: Էլի ժողովրդական-խոսակցականով ասված՝ «ռեմոնտ» էր արվել: Ցույց տվեց: Ինքը: Լավ էլ գործ էին արել ուստեքը: Տեղը՝ տեղին ու, պարզվում է, համարյա ձրի, կամ էլ՝ ժողովրդական սիրուց դրդված՝ մեծ զեղչերով:
Դե, չար լեզուներն ասում էին, թե ի պաշտոնե տրամադրվող առանձնատան վերանորոգման համար բյուջեից մի 2 միլիոն ԱՄՆ դոլարին համարժեք գումար են «շաբաշ տվել»: Նիկոլ Փաշինյանը, որ ցույց էր տալիս վերանորոգման վերջնարդյունքները, ասաց՝ մոգոնում են, ժըովուրդ ջան, դրանից մի 10 անգամ քչով ա էս ռեմոնտն արվել:
Ստացվում է, որ ոչ թե 2 մլն դոլար է ծախսվել Նիկոլ Փաշինյանին տրամադրված առանձնատան վերանորոգման համար, այլ 0,2 միլիոն, այն է՝ 200 հազար դոլար:
Մեր մեջ ասած, էլի քիչ չէ, բայց նորոգումներից հասկացողներն ասում են, թե քիչ է ասում, կարգին գործ է արված ու դա 200 հազարի բան չի:
Բայց դա ուրիշ հարց է: Ավելի գեղարվեստական հարցեր կան:
Նախ, երբ մի 20 օր առաջ լրատվամիջոցներից մեկը պաշտոնապես ցանկացել էր պարզել, թե՝ ախր, վերջիվերջո որքա՞ն գումար է տրամադրվել Նիկոլ Փաշինյանի կեցավայր-առանձնատան նորոգ ման նպատակով, նույնքան պաշտոնապես պատասխան ստացան, թե՝ դա պետական գաղտնիք է: Ու ի՞նչ: Ստացվում է, որ Նիկոլ Փաշինյանը, օրենքը խախտո՞ւմ է, որ ասում է, թե մոտ 200 հազար դոլար է ծախվել: Բա պետական գաղտնիքն ո՞ւր մնաց:
Երկրորդ հարցը շատ ավելի հետաքրքիր է. մի՞թե այդ առանձնատունը այնպիսի վիճակում էր, որ նորոգման կարիք էր զգացվում: Այդքան հրատա՞պ էր դա: Երկրում էլ լուծելու հարցեր չկա՞ն: Այդ, թեկուզ 200 հազար դոլարով քանի՞ մարդու խնդիր կլուծվեր:
Հազիվ մեկ տարի առաջվա վարչապետական «լայվերը» որ հիշեք, կմտաբերենք նաև, Փաշինյանի փայլփլուն աչքերը՝ «դաչաներում» նկատած «աղայական հաճույքներից» ու շենք-շինությունների ընտիր վիճակից: Բա, ախր, ասում էր՝ որ ես վարչապետ եմ, ուրեմն բոլորդ վարչապետ եք, «Պողոսներ» ջան: Բա որ էդպես է, թող օրը մեկ «Պողոս», ընտանյոք, այդ առանձնատանն անցկացնի: Համ էլ վերանորոգման որակը կգնահատեն, կիմանան «մատերիալը» Գնունո՞ւց են գնել, թե՞ «եռանկյունուց»:
Իսկ եթե ավելի լուրջ, ապա պարզ երևում է, որ Նիկոլ Փաշինյանի «ժողովրդական իշխանությունը» արդեն լավ էլ սերտաճել է իշխանական սովորական արատներին: Առանձնատան նորոգում, թանկարժեք չարտերային չվերթ, ծառայողական մեքենա, ճոխ-ճոխ գործուղումներ և այլն: Այդ ամեն ինչի համար, պարզվում է, միշտ էլ փող կա պետական գանձարանում:
Ու հարց կա, էլի. բա դրա՞ համար էին իշխանափոխություն անում: Այսինքն, նպատակը քաղաքացի Նիկոլ Փաշինյանի կենսապայմանների բերալավո՞ւմն էր:

Արմեն Սահակյանի ֆեյսբուքյան էջից