Մենք ոչ մի տեղ չենք պահում այն, ինչ ունենք, ամեն տեղ գրանցված է․ Լևոն Քոչարյանը՝ ընտանիքի ունեցվածքի մասին

Երևան քաղաքի ընդհանուր իրավասության դատարանի Շենգավիթի նստավայրում նոյեմբերի 5-ին դատավոր Աննա Դանիբեկյանի նախագահությամբ մեկնարկել է երկրորդ նախագահ Ռոբերտ Քոչարյանի, պաշտպանության նախկին նախարար Սեյրան Օհանյանի, ՀԱՊԿ նախկին գլխավոր քարտուղար Յուրի Խաչատուրովի և նախկին փոխվարչապետ Արմեն Գևորգյանի գործով նիստը: Ռոբերտ Քոչարյանը մասնակցում է նիստին վերջերս տարած վիրահատությունից հետո։

Նիստից առաջ Քոչարյանի որդին՝ Լևոն Քոչարյանը, խոսելով հոր վիրահատության մասին, հայտնեց, որ նա նիստին ներկա է լինելու․ «Առողջական խնդիրները լուծված են, ու ամեն օր ինքնազգացողությունը ավելի է լավանում։ Կար փոքրիկ ուռուցք, որը պետք է հեռացվեր, սակայն կարևորն այն է, որ չարորակ բջիջներ չհայտնաբերվեցին»։

Խոսելով ընտանիքի ունեցվածքի մասին՝ Լևոն Քոչարյանն ասաց, որ իրենք «ոչ մի տեղ չեն պահում այն, ինչ ունեն, ամեն տեղ գրանցված է»։ Նրա խոսքով՝ «տարիներ շարունակ այդ թեմայով սուտ է հրամցվել հանրությանը»։ 

Ռոբերտ Քոչարյանի որդին մեկնաբանեց նաև ընտանիքից նիստերին միայն իր մասնակցության փաստը՝ ասելով, որ դա իր անձնական որոշումն է։ 

Տարբեր վայրերում Քոչարյանի աջակիցների հավաքների մասով Լևոն Քոչարյանը նկատեց, որ մամուլով է հետևում դրանց ու այս պահի դրությամբ ցանկություն չունի մասնակցելու այդ ամենին։

«Կա վախի մթնոլորտ․ պետք է ամեն ինչ անել կոտրելու այդ մթնոլորտը»,- հայտարարեց երկրորդ նախագահի կրտսեր որդին։

Աղբյուր՝ CivilNet.am