Քոչարյանի պաշտպանները դիմել են ԱՆ՝ պահանջելով կարգապահական վարույթ հարուցել դատավոր Մհեր Արղամանյանի նկատմամբ

ՀՀ երկրորդ նախագահ Ռոբերտ Քոչարյանի պաշտպանական թիմը միջնորդություն է ներկայացրել Արդարադատության նախարարություն՝ Վերաքննիչ դատարանի դատավոր Մհեր Արղամանյանին կարգապահական պատասխանատվության ենթարկելու պահանջով, PrimeNews.am-ին տեղեկացրեց Քոչարյանի պաշտպանական խմբի անդամ Արամ Վարդևանյանը:

Պաշտպանները Վերաքննիչ դատարանի դատավոր Մհեր Արղամանյանի գործողություններն են վիճարկում, քանի որ վերջինը սեփական նախաձեռնությամբ ինքնաբացարկ չի ներկայացրել, իսկ ինքնաբացարկ հայտնելու մասին ներկայացված միջնորդություններն էլ քննության առարկա չի դարձրել: Ավելին, Արղամանյանը անտեսել էր նաև փաստաբան Վարդևանյանի ներկայացրած վերաքննիչ բողոքն ու դրա վերաբերյալ դատավարական որևէ գործողություն իր իրականացրել:

«Իմ վերաքննիչ բողոքի վերաբերյալ ես ստացել եմ նամակ պարոն Արղամանյանից, այն մասին, որ ինքն անդրադարձել է մյուս փաստաբանների ներկայացրած վերաքննիչ բողոքներին, դրա համար իմ բողոքը քննության առարկա չի դարձնում: Բայց դատարաններն ու դատավարության կողմերը նամակներով չէ, որ պետք է շփվեն, այլ՝ դատավարական ակտերով: Եթե նույնիսկ նրա նամակը իրավական տրամաբանություն ունենար, ապա ամեն դեպքում դա պետք է դատավարական ակտով կայացվեր», -ասաց Վարդևանյանը:

Փաստաբանի պնդմամբ, Վերաքննիչ դատարանի դատավոր Մհեր Արղամանյանը պետք է շատ արագ ինքնաբացարկ հայտներ և չքններ Քոչարյանի պաշտպանների վերաքննիչ բողոքը, քանի որ իր հետ փոխկապակցված անձը՝ որդին՝ Դավիթ Արղամանյանը, քաղաքականապես ակտիվ անձ է, սերտ առնչություն ունի իշխանական «Իմ քայլը» դաշինքի հետ, եղել է նույն դաշինքի պատգամավորական թեկնածուների թվում: Ավելին, Վարդևանյանն ասաց, որ դատավորի որդին մասնակցել է ընդդեմ Քոչարյանի բողոքի ակցիաներին՝ պահանջելով ազատ չարձակել նախկին նախագահին:

«Ես հույս ունեմ Արդարադատության նախարարությունը ընթացք կտա մեր միջնորդությանը և կհարուցի կարգապահական վարույթ, որից հետո խնդրի պատասխանատուն լինելու է Բարձրագույն դատական խորհուրդը: ԲԴԽ-ն չունի լիազորություն ինքնուրույն վարույթ հարուցել», -նշեց Վարդևանյանը:

Հիշեցնենք՝ Ռոբերտ Քոչարյանի փաստաբանները բողոքարկել էին Երևանի ընդհանուր իրավասության դատարանի դատավոր Աննա Դանիբեկյանի՝ սեպտեմբերի 17-ի որոշումը, որով Դանիբեկյանը մերժել էր անհապաղ վերացնել Քոչարյանի նկատմամբ ընտրված խափանման միջոց կալանավորումը: Փաստաբանների բողոքները մակագրվել էին դատավոր Մհեր Արղամանյանին, և փաստաբան Արամ Վարդևանյանն ինքնաբացարկի միջնորդություն էր ներկայացրել դատավոր Մհեր Արղամանյանին, քանի որ պարզ էր դարձել, որ Արղամանյանի հետ համատեղ բնակվող անձը՝ որդին, մասնակցել է սեպտեմբերի 17-ին Շենգավիթի դատարանի առջև Ռոբերտ Քոչարյանի դեմ կազմակերպված ցույցին։ Բայց դատավորն ինքնակամ ինքնաբացարկ չէր հայտնել ու ոչ էլ քննարկել էր փաստաբանի ներկայացրած ինքնաբացարկի միջնորդությունը։ Սակայն դրա փոխարեն մերժել էր վերաքննիչ բողոքները։