ՀՀ-ում ԱՄՆ դեսպանատունը՝ Հայաստանում գտնվող կենսաբանական լաբորատորիաներ ռուս մասնագետների այցի մասին

Կենսաբանական լաբորատորիաները տեղի մասնագետներով համալրված և Հայաստանի իրավասության ներքո գործող լաբորատորիաներ են։ Լաբորատորիաների տնօրինմանն առնչվող հարցերի դեպքում խնդրում ենք դիմել Հայաստանի կառավարությանը: Այս մասին Tert.am-ի հարցմանն ի պատասխան հայտնեցին Հայաստանում ԱՄՆ դեսպանատնից:

Հիշեցնենք, որ Ռուսաստանի Դաշնության արտգործնախարար Սերգեյ Լավրովը նոյեմբերի 10-11-ին այցելելու է Հայաստան: Ինչպես գրում է «Կոմերսանտ» թերթը՝ իր աղբյուրների հղումով, այցի շրջանակում հուշագիր կստորագրվի, որը կերաշխավորի ռուս մասնագետների այցը Հայաստանում գտնվող կենսաբանական լաբորատորիա, որը ստեղծվել է ԱՄՆ ռազմական գերատեսչության՝ Պենտագոնի տրամադրած միջոցներով: Նրանց թվում, ովքեր կարող են այցելել Հայաստանում գործող կենսաբանական լաբորատորիա, ՌԴ առողջապահության ու պաշտպանության նախարարությունների մասնագետներն են: