Վերջ, աշխատելու, աշխատանքի առաքելությունը այդքանով ավարտվե՞ց

Մի հանրային վայրում պատահաբար երեք աղջիկների խոսակցություն եմ լսում.
-Բա ե՞րբ ես սկսելու աշխատել:
-Կարոն արդեն պայմանավորվել է, էս քանի օրը հրամանս կլինի, կգնամ էլի երևի, թե չէ արդեն ներվայնացնում են, հա խոստանում են, չեն անում:
-Լավ ա չէ, գոնե տնից դուրս կգաս,- ասում է ակնհայտ աշխատանք ունեցողը
-Հա ոնց էլ չլինի, տանը ձանձրանալուց լավ կլինի...համ էլ մի քիչ ձեռի փող կունենամ...

Այսինքն ինքը էտքան ուզում էր ընդունվեր աշխատանքի, անգամ ծանոթ է խառնել ու այս ամենը մի սպասումով, որ ուղղակի "տնից դուրս գա", ասի՝ ես էլ աշխատում ու ամսվա վերջին ինչ-որ մի գումար ստանա: Վերջ, աշխատելու, աշխատանքի առաքելությունը այդքանով ավարտվե՞ց:

Սա մի հոգեբանություն է, որն ուղղակի պատկերացմանս մեջ չի տեղավորվում: Դա նշանակում է, որ դու քո վրա, որպես անհատ, որպես մարդ, որ պոտենցիալ հաջողակ մասնագետ կարող է դառնալ, ինքնադրսևորվել, առաջ գնալ, ձգտել, ստեղծել, խաչ ես քաշում: Դու քեզ ընդամենը հավասարեցնում ես աշխատավայրում տրված տրիվիալ գործառույթների մեխանիկական կատարմանը/չեմ հավատա, որ աշխատանքին նման կերպ վերաբերող մարդուն կարող են լուրջ ֆունկցիաներ վստահել/: Ու հետո մարդիկ բողոքում են ցածր աշխատավարձերից: Միանշանակ համաձայն եմ, որ այսօր աշխատավարձերը Հայաստանում ցածր են, բայց բոլորի դեպքում չի, որ պատճառը ընդհանուր սոցիալական իրավիճակն է: Իսկ ի՞նչ ես դու պատրաստ անել կազմակերպության առաջընթացի համար,որ գործատուն ցանկանա քեզ շատ վճարել, շահագրգիռ լինի պահելու քեզ՝որպես աշխատող, ոչ թե աշխատանքի վերցնի, որովհետև Կարոն է ասել: Ես դեմ չեմ, որ մարդիկ երբեմն դիմում են ծանոթներին՝աշխատանք գտնելու համար/հեշտ չի գործ գտնելը/, բայց հիմար կլինի այն գործատուն/հատկապես մասնավոր/, որ երկարատև պահի մի աշխատողի, ով արդեն ռեալ իրավիճակում չի ապացուցում, որ որպես կադր ինքն արժեքավոր է:

Ես չեմ բացառում նաև, որ կարող են լինեն դեպքեր, երբ ընկերությունն ինքն էլ լճացման մեջ է ու ուղղակի աճելու կամ նախաձեռնողականության տեղ չկա: Այդ պարագայում իսկապես աշխատել ցանկացող մարդը լուծումը կգտնի: Կամ նրա ձգտումները կտանեն այլ վայր, որտեղ կարելի է նվաճել կամ՝ինչու չդառնալ հենց այն շարժիչ ուժը, որ կարող է փոխել իրերի դրությունը:

Աստղիկ Խաչատրյանի ֆեյսբուքյան էջից