ՀՀԿ-ի Gallup-ը էլի հայերին մազոխիստ է անվանել

ՀՀԿ-ի Gallup-ը էլի հայերին մազոխիստ է անվանել։ Այսօր հարցման արդյունքներ են ներկայացրել, համաձայն որի հարցվածների 22,8 տոկոսը պատասխանել են, որ եթե ընտրությունները լինեն այս կիրակի, նրանք կքվեարկեն ՀՀԿ-ի օգտին։

Ինչի՞ համար։ Ո՞ր մեկդ եք ինչ լավ բան տեսել Սերժ Սարգսյանից ու նրա կուսակցությունից, որ գնաք ձեր հոժար կամքով ձեր ձայնը նրան տաք։ Դե իհարկե, այդպիսի բան անելու համար մարդ առնվազն մազոխիստ պետք է լինի։ Երկիրը ծանրագույն տնտեսական ճգնաժամի մեջ է, կապիտալը փախչում է, բնակչությունը փախչում է, աղքատների թիվն ավելանում, թշնամին էլ օրեցօր ավելի լկտիանում։ Եվ այս ամենի գլխավոր և միակ պատասխանատուն գործող վարչակարգն է։

Ո՞վ պետք է սրանց ձայն տա։ Դե իհարկե ոչմեկ։ Այս կազմակերպությունը հայտնվում է ընտրությունից ընտրություն ու Սերժ Սարգսյանի կուսակցության օգտին այսպիսի շինծու հարցումների արդյունքներ է հրապարակում, ընդ որում «սկսում է» ցածր թվերից, իսկ ընտրությունների օրվա մոտենալու հետ նաև ՀՀԿ-ի կամ Սերժ Սարգսյանի «ռեյթինգը» ավելացնում են։

Ես միայն մեկ տեղ եմ ճանաչում, որտեղ հարցում անցկացնելուց գուցե 20-25 տոկոսն ասի, որ ՀՀԿ-ի օգտին է քվեարկելու, դա այդ կուսակցության գլխավոր գրասենյակի շենքն ու դրա մերձակա տարածքն է։ Ամոթ էլ է, որ մարդ նման հարցին պատասխանի, որ ՀՀԿ-ի օգտին է քվեարկելու։ Այսօր նույնիսկ ՀՀԿ-ական լինելն ամոթ է, էլ ուր մնաց դրանց սատարելը։

Հրանտ Ենոքյանի ֆեյսբուքյան էջից