«Դա այն շրջանների վերադարձի հարցերն են, որոնք ներկայում զբաղեցնում են...». Լավրովը Մամեդյարովի հետ քննարկել է ԼՂ հակամարտությունը Մոսկվայում (տեսանյութ)
ՌԴ արտգործնախարար Սերգեյ Լավրովը հանդիպում է ունեցել նրա ադրբեջանցի գործընկեր Էլմար Մամեդյարովի հետ, որը պաշտոնական այցով գնտվում է Մոսկվայում: Համատեղ մամուլի ասուլիսի ժամանակ Սերգեյ Լավրովը հայտնեց, որ զրուցակիցներն անդրադարձել են նաև ղարաբաղյան խնդրին:
«Անշուշտ, մենք խոսել ենք նաև ղարաբաղյան խնդրի կարգավորումից: Ռուսաստանը շարունակելու է աջակցություն ցուցաբերել կողմերի համար ընդունելի ուղիների հանգուցալուծում, ինչպես մեր ու Ադրբեջանի և Հայաստանի միջև երկկողմանի հարաբերությունների, այնպես էլ եռակողմ՝ Ռուսաստան, Ադրբեջան և Հայաստան եռակողմ ձևաչափով», - ասաց նա, հավելելով, որ խնդրի կարգավորման ուղղությամբ բոլոր քայլերն արվում են հիմնվելով համանախագահների կողմից մշակված սկզբունքների հիման վրա:
«Sputnik»-ի լրագրողի այն հարցին, թե հնարավոր է արդյո՞ք ղարաբաղյան հակամարտության կարգավորումը, այսպես կոչված, «կազանյան բանաձևով», ՌԴ ԱԳ նախարարը պատասխանեց. «Մենք գտնում ենք, որ ղարաբաղյան հակամարտությունը կարգավորվողներից է: Դրա մասին են վկայում երկարամյա շփումները, որի արդյունքներով հնարավոր եղավ մշակել կարգավորմանը ենթակա կարևոր հարցերի շուրջ ընդհանուր ընկալում: Առաջին հերթին դա անվտանգության հարցերն են, հումանիտար հարցերն են, դա այն շրջանների վերադարձի հարցերն են, որոնք ներկայում զբաղեցնում են... որոնք գտնվում են ԼՂ շուրջ և որոնք չեն վերահսկվում Ադրբեջանի կողմից, դա նաև ԼՂ կարգավիճակի որոշման հարցերն են, իհարկե, այնտեղ բնակվող մարդկանց կարծիքը հաշվի առնելով, դա նաև միջազգային խաղաղապահ ուժերի պարամետրերի համաձայնեցումն է: Այդ ասպեկտների մեծ մասի վերաբերյալ մենք համաձայնություններ ունենք, բայց երկու-երեք հստակ կարևոր թեմա կա, որոնք դեռ քննարկվում են. և անկեղծ կլինեմ, մենք դեռ հեռու ենք այն պահից, երբ կողմերը կմշակեն մեկ ընդհանուր մետեցում մնացյալ ասպեկտների վերաբերյալ», - ասաց Լավրովը, հավելելով, որ հարկավոր է հասնել վերջերս գրանցված լարվածության թուլացմանը:
Zham.am
Հետևեք մեզ Facebook-ում