Պրոֆեսիոնալ բանակ կառուցելու կարևորագույն նախապայմանը մրցունակ աշխատավարձն է

Այսօր ներկայացվեց Օհանյան-Րաֆֆի-Օսկանյան դաշինքի ծրագիրը։ Ծրագրում ներկայացված պայմանագրային զինծառայողների, սպաների ու ենթասպաների աշխատավարձերի բարձրացման մասին։ Իսկապես, պրոֆեսիոնալ բանակ կառուցելու ճանապարհին սա կարևորագույն նախապայմաններից մեկն է։ Զինվորական ծառայությունը ոչ միայն պետք է հայրենասիրության դրսևորում լինի, այն պետք է «պրեստիժ» գործ, պատվաբեր ու շահավետ աշխատանք դառնա։ Բարձր աշխատավարձը լավ մասնագետ գտնելու, նրան աշխատավայրում պահելու կարևորագույն նախապայմանն է, բանակն էլ պետք է այդպիսին լինի։

Մենք ապրում ենք 21-րդ դարում ու դիպուկ կրակելը շատ քիչ է բանակում ծառայելու համար։ Իսկ որպեսզի լավ մասնագետը, «խելքով մարդը» որոշի իր կյանքը կապի բանակի հետ, նա պետք է վստահ լինի, որ ապահովված է լինելու, որ իր խելքով բանակում էլ կարող է վաստակել նույնքան գումար, որքան քաղաքացիական սեկտորում։

Ծրագրում նշված 240 և 480 հազար դրամ աշխատավարձերը՝ պայմանագրայինների ու սպաների համար, մեր երկրում կարող են դիտարկվել բավականին մրցունակ վարձատրություն։ Իհարկե, սրանով սահմանափակվել չի կարելի, պետք են սոցիալական և առողջապահական ապահովագրության լիարժեք ինստիտուտներ, պրոֆեսիոնալ զինվորականներին պետք է նաև բնակարաններով ապահովել, սակայն սկզբի համար սա էլ մեծ բան է։

Օհանյան-Րաֆֆի-Օսկանյան դաշինքի այսպիսի ծրագիրը, համոզված եմ՝ դրական կընկալվի հասարակության կողմից և ընտրությունների օրը ժողովուրդն իր քվեով հավանություն կտա այդ բարեփոխումներին։

Հրանտ Ենոքյանի ֆեյսբուքյան էջից