Շինարարության հաշվին տնտեսական աճը «փուչիկ» անվանեցին, բայց այլընտրանք չստեղծեցին

Շինարարության ծավալները Հայաստանում շարունակում են նվազել։ Եվ անկումն էլ սեզոնային չէ, քանի որ հունվար ամսին նախորդ տարվա հունվարի նկատմամբ անկումը կազմել է 5,3 տոկոս։ Հիշում եմ, երբ Սերժ Սարգսյանը եկավ իշխանության, Տիգրան Սարգսյանին էլ նշանակեց վարչապետ՝ տնտեսական խայտառակ անկումը, ճգնաժամն արդարացնելու համար, երբ նրանց մատնացույց էին անում Քոչարյանի կառավարման տարիների երկնիշ տնտեսական աճը, ասում էին, թե դա «փուչիկ է»։

Հարգելիներս, եթե դա «փուչիկ» էր, դուք էլ տենց «թույն» մասնագետներ էիք, այլընտրանք ստեղծեիք։ Մարդկանց ձեռքը մի երկու կոպեկ փող տեսաք, որոշեցիք խլեք լցնեք բյուջե ու բյուջեից մսխեք։ Փուչիկ էր ինչ էր, աշխատում էր, ունեինք տնտեսության լոկոմոտիվ, որը երկիրը զարգացնում էր։ Շինարարությունը հո մենակ շինարարությունով չի։ Այսօր ծավալների անկման պատճառով ամբողջույամբ կանգ է առել Հրազդանի ցեմենտի գործարանը։ Իսկ դա շատ մարդկանց համար ապրելու միջոց էր։

Հիմա էտ աշխատողները գործազուրկ են դառնալու։ Նրանք այդ փողը ծախսում էին խանութներում, դրանով էլի ուրիշ մարդիկ էին ապրում, հիմա նույն այդ խանութների եկամուտներն էլ կընկնեն։ Եվ սա միայն մեկ պարզ օրինակ է։ Շինարարության զարգացումը ենթադրում է նաև ենթակառուցվածքների զարգացում, ոլորտը սպասարկող ձեռնարկություններ, առևտուր և այլն։

Հիմա այս իշխանությունները դա ոչնչացրեցին, այլընտրանք էլ չստեղծեցին։ Անշարժ գույքի շուկան էլ մեռավ, հիպոտեքի տոկոսադրույքներն էլ այնքան բարձր են, պայմաններն էլ այնքան անշահավետ, որ հիպոտեքով տուն առնելու համար պետք է բավականին հարուստ մարդ լինես։ Հիխոտեքը Հայաստանում ոչ թե տուն ձեռքբերելու միջոց է, այլ ճոխություն, որը իրենց կարող են թույլ տալ շատ քչերը։ Այն ինչ այլ պայմաններում դա կարող էր տնտեսական զարգացման լրացուցիչ խթան հանդիսանալ, ֆինանսական ակտիվության ավելացման միջոց, որը դրական կազդեր նաև վարկավորման այլ տեսակների վրա։

Սա այնքան պարզ ճշմարտություններ են, որ սրանք չհասկանալն ամոթ է։ համոզված եմ, որ իշխանություններն էլ են սա հասկանում, սակայն նրանք այլ շահերով են առաջնորդվում․ոնցոր ասում են, տնտեսական աճը, քաղաքացիների բարեկեցությունը օֆշորում չես պահի։

Հրանտ Ենոքյանի ֆեյսբուքյան էջից