ԼՂՀ-ն շահագրգռված է իր ապրանքների արտահանման և ներկրման աշխարհագրության ընդլայնման հարցում. Բակո Սահակյան
Լեռնային Ղարաբաղի Հանրապետությունը շահագրգռված է իր ապրանքների արտահանման և ներկրման աշխարհագրության ընդլայնման հարցում: Փոխանցում է «Tert.am»-ը gazeta.ru-ին հղելով, որին հարցազրույց է տվել Աևցախի նախագահ Բակո Սահակյանը:
«Այս տասը տարիների ընթացքում շատ բան է արվել: Բոլոր այս տարիներին ՀՆԱ-ի միջին տարեկան աճը կազմել է 7-9 տոկոս: Իրականացվել են մի շարք ռազմավարական նախագծեր մեր տնտեսության բոլոր ոլորտներում»,- նշել է նա՝ հավելելով, որ դինամիկ զարգանում են երկրի տնտեսության գրեթե բոլոր ճյուղերը:
Բակո Սահակյանի խոսքերով՝ եթե ոչ վաղ անցյալում Ղարաբաղը ստիպված էր էլեկտրաէներգի և հացահատիկային մշակաբույսեր ներկրել, ապա այժմ կարողանում է ոչ միայն բավարարել սեփական պահանջները, այլև հնարավորություն ունի արտահանել և էլեկտրաէներգիա, և հացահատիկային մշակաբույսեր:
«Ինչ վերաբերում է հիասթափություններին, ես կնախընտրեի դրա փոխարեն օգտագործել «ցավ» բառը: Դա անդառնալի կորուստների ցավն է: Այս տարիների ընթացքում՝ հատկապես 2016 թվականի ապրիլյան քառօրյա պատերազմի ժամանակ տասնյակ մեր զինծառայողներ, ինչպես նաև քաղաքացիական բնակչության ներկայացուցիչներ են զոհվել Ադրբեջանի նենգ գործողությունների պատճառով: Նույնն բանն է զգում Արցախի ցանկացած բնակիչ, և ես, որպես երկրի ղեկավար, այդ ցավը կրկնակի եմ զգում: Ընկածների լուսավոր հիշատակը հավերժ կմնա մեր սրտերում և մեր ժողովրդի պատմության մեջ»,- ասել է Բակո Սահակյանը:
Բակո Սահակյանը հավելել է, որ ԼՂՀ-ն շահագրգռված է իր ապրանքների արտահանման և ներկրման աշխարհագրության ընդլայնման հարցում և դրա համար օգտագործում է եղած բոլոր հնարավորությունները:
«ԵԱՏՄ-ի և ԵՄ-ի շուկաները մեզ համար հատուկ հետաքրքրություն են ներկայացնում: Փոխշահավետ կապերը մենք արդեն հաստատել ենք և մտադիր ենք շարունակել ընդլայնել և խորացնել նրանց հետ տնտեսական համագործակցությունը»,- ասել է ԼՂՀ նախագահը:
Հետևեք մեզ Facebook-ում