«Յոթ կիլո օրենքի նախագիծ. չենք հասցնում թերթել» (տեսանյութ)
ԱԺ-ն այսօր քննարկում է «Բնության հատուկ պահպանման տարածքների մասին» օրենքի փոփոխությունները: Նախագիծը ներկայացնում է Բնապահպանության փոխնախարար Սիմոն Պապյանը:
ՀԱԿ խմբակցության քարտուղար Արամ Մանուկյանը նախ նշեց. «Այս ձեւի անխղճությո՞ւն՝ յոթ կիլո օրենքի նախագիծ. չենք հասցնում թերթել, արդյունքում՝ նախագծի ընկալման որակն ընկնում է՝ քվեարկում ենք ու չգիտենք՝ ինչ ենք քվեարկում»:
ԱԺ նախագահ Գալուստ Սահակյանն արձագանքեց՝ ասելով. «Դրա համար պետք է ներկա լինել ու քննարկել: Ընդդիմադիր կողմը պետք է օրենքների հետ կապված առաջարկներ անի»: «Նայեք դահլիճին՝ ինչքան մարդ կա: Դա ձեր պատասխանատվությունն է»,- պատասխանեց Արամ Մանուկյանն՝ ավելացնելով. «Ժամանակին քննարկվում էր արգելոցներում կենդանինների՝ բուծման, ապա՝ թույլատրելի որսի կազմակերպման մասին: Մանրամասն չեմ կարդացել նախագիծը, ձեզ զուտ վստահելով՝ կարո՞ղ եք հավաստիացնել, որ խստացված են ընդհանուր մոտեցումները, որ ավելի պաշտպանված լինեն հատուկ տարածքները, թե՞ զուտ ձեւակերպումներ են»:
Սուրեն Պապյանը նշեց, որ օրենքի այս փոփոխությունները 2013թ. գտնվում են ԱԺ-ում. «Քննարկումներ են եղել ու հետաքրքիր առաջարկություններ են արվել: Իսկ օրենքն ընդունվել է 2006թ.: Ինչ վերաբերում է սաֆարիի բլոկին, ապա նոր ԱԺ-ին կներկայացնենք «Կենդանական աշխարհի մասին» օրենքի փոփոխություններ կներկայացնենք, քանի որ օրենսդրական բացեր շատ ունենք»:
Մանրամասները՝ «Ա1+»-ի տեսանյութում: